Қаржыгер ардагерлерге құрмет
Кеше Қазақстан Республикасы Қаржы министрлігі Қазынашылық комитетінің ардагерлеріне Қарттар күніне орай құрмет көрсетіліп, ұлықтау шарасы өтті.
Іс-шараның басты мақсаты мекеменің дамуына өз үлесін қосқан ардагерлердің еңбегін жастар арасында насихаттап, Қазынашылық комитетінің бүгінгі жаңалықтарымен, тыныс-тіршілігімен таныстыру болды.
Салтанатты шараға мекеменің дамуына сүбелі үлес қосқан 35 ардагер шақырылды. Құттықтау сөз Қаржы министрлігі Қазынашылық комитетінің төрағасы Рахат Тоқбаевқа берілді.
– Құрметті ардагерлер! Қазынашылық комитетінің бүгінгі жеткен жетістіктеріне сіздердің бастамаларыңыз зор ықпал етті. Сіздерге алғысымды білдіре отырып, келер мерекемен шын жүректен құттықтаймын! – деп ілтипатын білдірді.
Қаржыгер ардагерлерге алғыс хаттар мен бағалы сыйлықтар тарту етілді. Салтанатты іс-шара концерттік бағдарламамен жалғасты.