Премьер-министр Әлихан Смайылов пен Астана қаласының әкімі Жеңіс Қасымбек өмірлік қиын жағдайға тап болған балаларды қолдау орталығына барды. Бұл туралы Үкіметтің баспасөз қызметі хабарлады. Үкімет басшысы орталықта тұратын балалармен тілдесіп, олардың тұрмысымен және оқу жағдайымен танысты. Премьер-министрге оқу кабинеті, ойын алаңы, жатын бөлмелер мен асхана көрсетілді, сондай-ақ балалармен жүргізіліп жатқан жұмыстар және оларды мектептен кейінгі қолдау шаралары туралы айтылды.
Әлихан Смайылов орталық тәрбиеленушілерін Халықаралық балаларды қорғау күнімен құттықтады.
«Бұл – біз үшін ерекше мереке, өйткені балалар – біздің болашағымыз! Балалардың дені сау, ақылды және табысты болып ержетіп, сапалы білім алғанын қалаймыз. Ал мемлекет бұл үшін барлық қажетті жағдайды жасауды жалғастырмақ» деді Премьер-министр.
Үкімет басшысы ел Президенті жетім балаларды әлеуметтік қорғау және оларды отбасында тәрбиелеу мәселелеріне ерекше назар аударатынын атап өтті. Соңғы 10 жылда республикадағы балалар үйлерінің саны 41 пайызға, ал ондағы балалар саны 65 пайызға төмендеді. Бүгінгі таңда елде 3700-ге жуық бала тұратын осындай 116 мекеме бар.
«Біз әр баланың отбасында тәрбиеленгенін қалаймыз. Сондықтан жыл соңына дейін кәсіби асырап алушы отбасылар институтын енгізу бойынша заңнамалық нормалар қабылданады. Біз барлық бала отбасында тәрбиеленуі керек деген мақсат қойып отырмыз. Сол кезде балалар үйлерінің қажеті де болмай қалады» деді Әлихан Смайылов.
9-сынып оқушысы Надежда Малахова Премьер-министрге орталық тәрбиеленушілері салған суретті сыйлады. Ал балаларға тәтті сыйлықтар, велосипедтер мен самокаттар тарту етілді. Әлихан Смайылов орталықта тәрбиеші болып жұмыс істейтін мекеме түлектері Гүлзат Газеева және Мария Захаровамен, сондай-ақ Қазақстанның балалар үйлері түлектері қауымдастығының басшысы Рафаэль Гасанов және орталық директоры Бибігүл Такисовамен әңгімелесті. Үкімет басшысы жетім және ата-анасының қамқорлығынсыз қалған балаларға қатысты сұрақтарға егжей-тегжейлі жауап берді. Атап айтқанда, оларды баспанамен қамту және білім беру шаралары туралы сөз қозғады.
«Биыл республикалық бюджеттен халықтың әлеуметтік осал топтары үшін жалға берілетін пәтерлерді сатып алуға 100 млрд теңгеден астам қаржы бөлінді. Бұл қаражаттың кем дегенде 20 пайызы жетім және ата-анасының қамқорлығынсыз қалған балаларға беріледі. Сонымен қатар, әр өңірде бюджеттен тыс және демеушілер қолдауы есебінен тұрғын үймен қамтамасыз ету жөніндегі іс-шаралар көзделген осы санаттағы балаларды қолдау жөніндегі кешенді жоспарлар бар» деді Әлихан Смайылов.
Сонымен қатар Премьер-министр әлеуметтік осал санаттағы балалар үшін оқуға квота көзделгенін атап өтті, бүгінде ол бекітілген мемлекеттік білім беру тапсырысының 1 пайызын құрайды. Тәжірибе көрсеткендей, бұл жеткілікті көлем, алайда Үкімет, қажет болған жағдайда, оның мөлшерін қайта қарауға дайын. Әңгіме барысында орталық директоры Бибігүл Такисова Премьер-министрге мекеме аумағында спорт алаңын салуға жәрдемдесу туралы өтініш айтты. Әлихан Смайылов қала әкімі Жеңіс Қасымбекке осы мәселені қысқа мерзімде шешуді тапсырды. Бүгінгі таңда орталықта үш жастан 18 жасқа дейінгі 66 бала тұрады, оның ішінде 28 жетім бала бар.
«Мемлекет басшысы балаларды әлеуметтік қорғау мәселесіне ерекше көңіл бөледі. Сол сияқты бүгін мектептерде 11-сынып оқушыларына арнап соңғы қоңырау соғылды. Түлектерге ҰБТ мен емтихандарда сәттілік тілеймін! Оқушыларымыз үлкен өмірге қадам басқалы отыр. Түлектердің таңдаған мамандығы алдағы өміріне үлкен қуаныш әкеліп, биік шыңдарды бағындыруын тілеймін! Бүгінгі мерекемен тағы да құттықтаймын! Әрбір отбасына зор денсаулық, бақыт және табыс тілеймін! Баланың жүзіндегі шынайы күлкі ата-ана үшін ең үлкен қуаныштың бірі екені анық» деп жазды қала басшысы әлеуметтік желідегі парақшасында.
