Астанада «Баспасөзге жазылушылар» мерекесі өтті.
«Қазпошта» АҚ «Астана почтамты» астаналық филиалы ұйымдастырған іс-шараға «Егемен Қазақстан», «Казахстанская правда», «Астана ақшамы», «Вечерняя Астана», «Айқын», «Литер», «Түркістан», «Қазақстан кәсіподағы», «Елорда білімі», «Жаңа бастау» газеттері, «National geographic» журналы және басқа да баспасөз өкілдері қатысты.
Мерекелік іс-шара барысында оқырмандар газет-журнал басшыларымен, сондай-ақ журналистермен сұхбаттасып, өздерінің ойларын ортаға салды. Ал өз кезегінде редакция өкілдері «Астана почтамт» мекемесінің басшылығына әріптестік қарым-қатынастары үшін ризашылықтарын білдіріп, бірқатар почта қызметінің ардагерлеріне алғыс хаттар мен сыйлықтар берді.
Болат АБЕНОВ, МИБ төрағасы:
– Мен «Астана ақшамы» және «Вечерняя Астана» газеттерінің оқырманымын. Осы басылымдардан барлық жаңалықты, өзімізге қажетті ақпаратты аламыз. Бүгінгі іс-шараға арнайы келдім. Журналистермен кездескім келді. Рахметімді айттым. Астаналық газеттерге міндетті түрде жазыламын.
Іс-шара барысында газетке жазылушылар да табылды. Соның бірі журналистика ардагері Ғалия Балтабай болды.
– Мен радио журналисімін. Бірақ газет-журнал деген – менің рухани азығым. Редакция қызметкерлеріне шығармашылық шабыт тілеймін. Ырым болсын деп алдағы жылға «Астана ақшамы» газетіне жазылдым.
Баспасөзге жазылушылар мерекесі шын мәнінде оқырман мен журналистердің жүздестірген, ойлы ұсыныстар ортаға салынған игі іс-шара болды. Осындай шараны ұйымдастырған «Астана почтамт» ұжымына «Elorda Aqparat» медиакомпаниясының директоры Олжас Сыдықбек әріптестік қарым-қатынас үшін алғысын айтып, халық үшін жасап жатқан берекелі істеріне сәттілік тіледі.
Мерекелік іс-шара мекеме қызметкерлерінің концертіне ұласты.
