Ұсыныс-пікірлер айтылды
Елордада мәслихат депутаттары №1 арнайы мектеп-интернатының мұғалімдерімен кездесіп, «Әділетті мемлекет. Біртұтас ұлт. Берекелі қоғам» тақырыбындағы Мемлекет басшысының Жолдауын талқылады
Кездесуге Астана қаласы мәслихатының депутаттары Азамат Айтхожин, Ерлан Дәкенов, мектеп-интернаттың директоры Ұлан Қуаныш және мектеп ұжымы қатысты.
Жиналған қауым білім беру жүйесін, білім мен тәрбие берудің сапасын арттыру мәселелерін талқылады.
– Бүгінгі кездесу барысында Президенттің Қазақстан халқына Жолдауы талқыланды. Одан бөлек, мектеп-интернатта жұмыс істейтін әр қызметкер мәслихат депутаттарына өз сауалдарын қойды. Сондай-ақ кейбір мәселелер бойынша өз ұсыныстарын айтты. Мұндай кездесулер жиі болып тұрғанын қалаймыз, – деді мектеп-интернат директоры Ұлан Қуаныш.
Кездесуде бірқатар мәселелер көтерілді. Оның ішінде жалақының төмендігі, кадрлардың тапшылығы, жылы аялдамалар салу мен қоғамдық көлік мәселесі бар. Бұл туралы Астана қаласы мәслихатының депутаты Ерлан Дәкенов:
– Байқасаңыздар, жылы аялдамалар тек қаланың ішіне қойылған. Біз ұстаздардың жұмысқа, балалардың мектепке келіп, білім алуына жағдай жасауымыз қажет. Бұл мәселелерді республикалық деңгейде көтеретін боламыз, – деді.
Мектеп-интернатта қазіргі таңда 264 қызметкер жұмыс істейді.