1032 орындаушы – 1 күй
Физика-математика бағытындағы елордалық Назарбаев зияткерлік мектебінде 1000 оқушы бір мезетте бірнеше күй орындады. Іс-шара оқу жылының соңында «Ең ауқымды домбыра сабағы» атауымен Гиннесс рекордтар кітабына енеді.
Рекордтар кітабына енуге өтінімді былтыр желтоқсан айында берген. Нәтижесінде сабақты 25-тен астам стюард пен 2 куәгер қадағалады. Олар қатысушылардың домбыра шертіп отырғанына көз жеткізді. Оқушылар «Балбырауын», «Еркем-ай», «Кеңес», «Жастар биі» танымал күйлерін күмбірлете орындады.
Сабақты Қазақстанның еңбек сіңірген мәдениет қайраткері Айтжан Тоқтаған өткізді.
– Біздің оқушылар физика, математика бағытын тереңдетіп оқыса да, өнерден құралақан емес. Балалар домбыраны тез меңгеріп алды. Оларды нотамен емес, тек қағыстарды көрсету арқылы үйреттік. Пандемияға дейін көп күй тартып үйренген едік. Кейін дайындық онлайн болды, сәл нашарлап қалдық. Келесі жылы ұстаздармен бірге оқушыларға «Сарыарқа» күйін үйрету ойымызда бар, – деді Айтжан Тоқтаған.
«Назарбаев зияткерлік мектептері» дербес білім беру ұйымының басқарма төрайымы Күләш Шәмшидинованың айтуынша, негізгі мақсат – балаларға домбыраны үйрету.
– Бұл арқылы балаларға ұлттық тәрбие беріп, ұлтжанды азамат тәрбиелегіміз келеді. Оқушылар жас болса да қазақтың домбырасын дүние жүзіне танытты. Осы арқылы әр бала өз үлесін қосты. Сондай-ақ бүгін барлық Назарбаев зияткерлік мектептеріндегі оқу жылы домбыра сабағымен аяқталып жатыр, – деді Күләш Шәмшидинова.
8-сынып оқушысы Әлтайыр Жұмаш ауқымды шараға көп уақыт дайындалғанын айтты.
– Қыстан бері дайындалдық. Бәріміз қобалжыдық. Бірақ барлығы жақсы өтті деп ойлаймын. Домбыраның әуені әдемі. Алдағы уақытта жалғастыру ойымда бар, – дейді ол.
Еліміздегі барлық НЗМ-де «100 күйдің тарихы» жобасы аясында барлық мектепте домбыра ансамбльдері мен студиялары жұмыс істейді.
Баян асылбекова