2035 жылға қарай Астана халқының 60%-ға, 2024 жылғы 1,5 миллионнан 2,3 миллионға дейін өсуі болжануда. Бүгінгі таңда амбулаториялық көмекті 47 емхана ұсынады, оның 16-сы Мемлекеттік, 29-ы жеке және 2-і ведомстволық болып табылады. Емханаларға нақты бару саны олардың жоспарлы қуатынан 3 есе артық, деп хабарлайды www.astana-akshamy.kz
Медициналық көмектің қолжетімділігі мен сапасын жақсарту үшін Бірыңғай Стандарт әзірленді, оның мақсаты амбулаториялық-емханалық ұйымдардың жұмысын тиімді ұйымдастыру, заманауи технологияларды дамыту және пациенттер үшін қолайлы орта құру болып табылады. Жаңа Бірыңғай Стандарттың жобасын қалалық Қоғамдық денсаулық сақтау басқармасының басшысы Әлия Рүстемова 2024 жылдың І жартыжылдығының қорытындысы бойынша Басқарма алқасының отырысында ұсынды.
Стандартты әзірлеу барысында мәскеулік емханалар стандартын енгізу тәжірибесі, сондай-ақ Канада, Ұлыбритания, Швеция, Финляндия және Эстониядағы алғашқы медициналық-санитарлық көмек тәжірибесі зерттелді. Жаңа Стандарттың негізіне басты төрт қағида жатады:
қолжетімділік – медициналық көмекті халыққа жақындату;
сапа – медициналық көмек көрсету үдерістерін жетілдіру;
технологиялар – цифрлық ортаны дамыту;
жайлы орта – ыңғайлы кеңістік құру.Жаңа Стандартты енгізу алғашқы медициналық-санитарлық көмектің қолжетімділігін арттыруға, учаскелік қызметке жүктемені азайтуға, шұғыл емдеуге жатқызу деңгейін төмендетуге, медициналық көмектің сапасын арттыруға және халықтың қанағаттануын арттыруға мүмкіндік береді.
Медициналық қызметтердің қолжетімділігін жақсарту үшін мынадай механизмдер іске асырылатын болады:
Жаңа денсаулық сақтау объектілерін салу: Қалада алдағы 4 жылда 2 мемлекеттік емхана мен 5 жеке емхана салу жоспарлануда.Емханаларды ірілендіру: Медициналық көмекке қолжетімділікті жақсарту үшін диагностикалық қызметтері бар емханалар жанынан Отбасылық медицина орталығының болуын қамтамасыз ету. Бұл күту уақытын қысқарта отырып, мамандандырылған қызметтерге қолжетімділікті жақсартады.МСАК ұйымдарын жарақтандыру: Диагностика мен емдеу сапасын арттыру үшін заманауи жабдықтар мен технологияларды енгізу.Жаңа стандарттың маңызды бөлігі халықтың барлық санаттары үшін қолайлы орта құру болып табылады. Емханаларда мыналарды енгізу қажет:
Мүмкіндігі шектеулі топтар мен балалары бар ата-аналарға арналған аймақтар;Электрондық кезек және ауыз суға қол жеткізу;Пациенттерге ыңғайлы болу үшін эргономикалық дизайн және түс навигациясы.
«МСАК Бірыңғай Стандартын енгізу үздік әлемдік тәжірибелерге сәйкес келуге және Астанада медициналық көмектің сапасын жақсартуға бағытталған. Біз бұл жобаны қолдауды және оны бекіту үшін Астана қаласы мәслихатының қарауына шығаруды сұраймыз», – деп атап өтті Әлия Рүстемова.
