Қазіргі кезде еліміздегі алты өңір «жасыл» аймаққа енді. Бес өңір «қызыл» және алты өңір «сары» аймақта тұр. Қазақстандағы эпидемиологиялық ахуал туралы Денсаулық сақтау министрі Алексей Цой Мәжілістегі үкімет сағатында егжей-тегжейлі баяндады.
Министр Қазақстан індеттің 4 толқынынан өткенін мәлім етті. Ол дерттің алдын алу және эпидемияға қарсы шараларды уақытылы жүргізу аурушаңдықтың төмендеуіне және эпидемиологиялық ахуалдың тұрақтануына септігін тигізгенін айтты. «Қазіргі таңда елімізде COVID-19 инфекциясы бойынша эпидемиологиялық жағдай тұрақтанды. Тәулігіне індетке шалдыққан 2 мың адамға дейін тіркеледі, 1 тамызбен салыстырғанда репродуктивті сан 1,2 есе, 1,11-ден 0,96-ға дейін төмендеді» деді министр.
Сондай-ақ республика бойынша инфекциялық және реанимациялық төсек-орын қоры да азайған. Бүгінде елде инфекциялық төсек-орынның 36 пайызы, реанимациялық төсек-орынның 33 пайызы бос емес. Төсек-орын қорының резерві 22 мың орынды құрайды. А.Цой эпидемиологиялық ахуалды бағалау матрицасына тоқталып, қазір 6 өңір (Алматы, Ақтөбе, Шығыс Қазақстан, Батыс Қазақстан, Қарағанды және Қостанай облыстары) «сары» аймақта тұрғанын жеткізді. Алты өңір – Атырау, Жамбыл, Қызылорда, Маңғыстау, Түркістан облыстары мен Шымкент қаласы «жасыл» аймақта орналасса, 5 өңір (Ақмола, Павлодар, Солтүстік Қазақстан облыстары Алматы мен Нұр-Сұлтан қалалары) – «қызыл» аймақта. Жалпы алғанда, Қазақстан сары аймаққа өтті.
