Имандылық бізге көптік етпейді…
«Астанада неге мешіт көп?» дейді,
Шүкір,
Шүкір!
Бола берсін көп, мейлі.
Мешіт деген – ұясы ғой иманның,
Имандылық бізге көптік етпейді…» Бұл – фейсбукте Мұқағалиша жазылған дүние. Әлеуметтік желідегілер мешіт төңірегінде дауласа қалды. Ойланбай пікірін лақ еткізгендер де бар. Бәрі Астанадағы тоғызыншы мешіт ашылғанда басталды.
Шидің басы неден сынды?
Алматыда 50-ге жуық Алланың үйі қаланған. Ал бір ғана оңтүстіктің өзінде 100-ге жуық құлшылық орны бар. Астана мен Шымкент тұрғындары саны жағынан тым алшақ емес қой. «Қыруар ақшаны желге кетіріп» дегеннен шықты дау. Мешіттерге жұмсалатын қаржы бюджеттен емес, жеке инвесторлардан тартылады ғой. Біз тоғызыншы мешітті көпсініп жүргенде, іргедегі Қырғызстанның Дін істері жөніндегі мемлекеттік комитеті директорының орынбасары Закир Чотаев Кеңес Одағы ыдырағаннан кейін Қырғызстанда 39 мешіт болғанын, бүгінде олардың саны мемлекеттегі орта мектептерден артып, 2600-ге жеткенін айтқаны есімізге түсті.
Біздегі талас әр рудың өз атасына ғибадат үйін салдырғанынан бастау алған баяғыда. Оңтүстік өңірінде күмбезі бар үй көтеріп, оны мешіт атайтындар көбейіпті соңғы кезде. Мақтаарал ауданы Асықата өңірі Жаңа дала ауылында сәулетіне сәні жарасқан «Атақұл ата» мешіті ел игілігіне берілгенде де осы әңгіменің басы қылтиған.
Алғашқы мешіт қашан пайда болды?
Діни аңыздарға қарағанда, алғашқы мешіт VII ғасырда Медине жанындағы мекенде салынған көрінеді. Қағба тарихына қатысты Ибн Зия атты зиялының еңбегінде былай делініпті: «Адам (а.с.) жәннаттан жерге түсірілгенде Алла Тағалаға: «Уа, Раббым, маған не болды, мен неге періштелердің дауысын да, сыбырын да естімеймін?» деп сұрағанда Жаратушы Иеміз: «Қателігіңнен, ей, Адам! Алайда жер бетінде Менің разылығым үшін бір үй тұрғызып, періштелердің Аршты айналып жатқанын көргеніңдей, сол үйді тәуап ет, Мені есіңе ал» деді». (Ибн Зия. Қасиетті Мекке тарихы мен әл-Харам мешітінің тарихы. Бейрут, 1997, 55 бет). Демек, мешіт салу дәстүрі дін пайда болған дәуірден бар.
Медресе де салынса
Әлгі таласушылардың арасында Кенжебек Ескендіров газетімізге хабарласып, «Сол мешіттердің қасынан шәкірт тәрбиелейтін медресе ашылса, құба-құп» деген уәж айтты. Ал Жақсылық Тастанов есімді оқырман әрбір шақырымға бір мешіттен керек дегенді алға тартады.
Дін өкілі не дейді?
Осы мәселе төңірегінде дін өкілдерінің пікірін білмекке Астана мешіттерінің біразын араладық. Еліміздегі дін арнасының журналистеріне де хабарластық. Қазақстан мұсылмандары діни басқармасы өкіліне де шықтық. «Мешіттің көптеп салынуына таласудың өзі – ұят» деп қысқа қайырды олар. Дін қызметкерлерін ашуландыратындай-ақ шу. Айтқанындай, елорда төрінде баламалы энергия көзімен жанданатын мешіт күнде салынып жатқан жоқ қой, ұғынсақ.
Футуристік ғимарат керек пе?
Бірақ мәселе сол баламалы дегеннен және мешіттің құрылысына қатысты туындап отыр. Мәселен, белгілі журналист Дина Елгезек былай дейді: «Постмодернистік стильдегі мешіт салыныпты. Пай-пай, шіркін-ай! Енді құлшылық етер ғибадатxанасын да модернизациялап жіберіппіз. Баламалы энергиямен қуаттанатын авангард құтxананың дизайны дін қағидаларына қайшы емес екен. Бас қаламызға ерекше сәулет беріп тұрғаны анық. Бірақ деймін-ау, дәл қазіргідей қысылтаяң шақта футуристік ғимарат салу кімге қажет болды?».
Біздің айтарымыз: бірегей, көз тартатын ғимараттары бір-бірімен бой таластырған бас қаламызда жүзден астам мектеп бар, емхана, аурухана кешендері де аз емес, ал енді спорт, мәдениет ғимараттары жөнінен елді ғана емес, көршілерді де әлдеқашан артқа тастағанбыз. Ендеше, мешіттерді неге көпсінеміз? Қайта, бір-біріне ұқсамайтын, бірегей ғимараттарға қуанайық.
Қажеттігін шын ұғынсақ…
Бір психолог қалада келе жатып, ана мен баланың әңгімесіне куә болыпты. Зәулім мешіттердің бірінің қасында болыпты оқиға. Анасынан жанындағы балақай қолын мешітке қарай созыңқырап: «Мынау не?» деп сұрапты. Анасы: «Бұл – мешіт қой» деп жауап қатады. Баласы: «Бұл не?» деп сұрағын қайта қойды. Жауап тағы да қайталанды. Діттеген жауабын ала алмай тұрған бала тағы да: «Бұл не?» деп кішкене сұқ саусағын шошайтты. Қайта-қайта бір сұрақты қоя берген перзентіне ашуланған әйел: «Балам, мешіт деп айттым ғой саған» деп зекіп тастапты. Сонда психолог үндемей қалуға дәті шыдамай, әлгі әйелге: «Кешіріңіз, ханым, балаңыз сізден мешіттің атын ғана сұрап тұрған жоқ. Өзі күнде көріп жүрген жай үйлерге ұқсамаған соң, оның адамдарға не үшін қажет екендігін сұраған жоқ па?» деуге мәжбүр болыпты.
Тобықтай түйін
2018 жылдың ақпан айындағы есеп бойынша Қазақстанда 2600 мешіттің 84-і қаңырап бос тұр екен. Жамағат жиналмайды. Бұл процесті жүйеге келтіру үшін ғибадатхана салуда рұқсат беретін айқын стандарттар керек. Бұл туралы біраз бұрын ҚР Дін істері және азаматтық қоғам министрі кезінде Нұрлан Ермекбаев мәлімдеген болатын.
«Жаңадан құрылыс салуға ниетті азаматтарға қосымша талаптар қойылуы мүмкін. Мысалы, ғибадатхана салудың жаңа үлгілік ережелерін енгізу керек. Мәселен, егер де мешіт немесе шіркеу қараусыз қалса, жамағат аз келсе, ғибадатхана халық көп жүретін көше бойында салынып, бірақ көлік қоятын орындары болмаса, қатты дыбыстар сол жердегі тұрғындардың мазасын алса, онда бұл құбылыс тек жағымсыз әрекеттерді туғызатыны анық. Өкінішке қарай, бізге мұндай шағымдар түсіп жатыр. Кейде мешіт салу сәнқойлық болып саналады, ал мешітте имамның болмауы немесе оны ұстап тұру жергілікті қауымға ауыр тиетіні назарға алынбайды. Салдарынан кейбір жерлерде мешіт ғимараттары сатылымға шығарылып жатыр. Құдайшылық іс бұл тек мешіт немесе шіркеу салу ғана емес» деген еді Нұрлан Ермекбаев.
Мешітте адам рухы Алламен қауышады. Ал адам жаны Тәңірімен іштей тілдесіп, жан дүниесі рахатқа бөленеді. Өйткені пенденің Алла Тағалаға ең жақын сәті – сәждеге маңдай тигізген кезі. Қысқасы, ислам дінінің ең асыл құндылықтарының бірі – мешіт. Сол үшін мұсылмандар мүмкіндігінше мешіт салуға ерекше ықыласты болған. Олар бір мекеннен екінші бір жерге көшіп барған кезде, алдымен құлшылық жасайтын құтхана салуды ойлаған.
Біз 84 мешіт бос тұрғанда, тоғызыншы мешіт төңірегінде дауласпайық! Себебі Астанадағы мешіттерде жұма намазы, Рамазан айында мінәжат ету қиын, кісі өте көп. Әр аудан, мөлтек ауданда мешіт болса құба-құп.
Қарлыға
ИБРАГИМОВА
Телеарнадан Омар инб ал Хаттаб деген телехикаяны корсетсениз, бирде Бир мешит бос калмайды