2024 жылдың 27 қараша күні сағат 19:00-де Роза Бағланова атындағы «Қазақконцерт» мемлекеттік концерт ұйымының үлкен залында композитор Нұрғиса Тілендиевтің 100 жылдығына орай «ОТЫРАР САЗЫ ШАҚЫРАДЫ!» концерті өтеді, деп хабарлайды astana-akshamy.kz
Сахна төрінде Қазақстанның көрнекті оркестрлері өнер көрсетеді: Алматы қаласынан «Отырар сазы»
Н. Тілендиев атындағы академиялық фольклорлық-этнографиялық оркестрі және Астана қаласынан Еркеғали Рахмадиев атындағы мемлекеттік академиялық филармониясының симфониялық оркестрі.
Елорда тұрғындары мен қонақтары екі оркестрдің және халықаралық байқаулардың лауреаты Е. Рахмадиев атындағы мемлекеттік академиялық филармониясының Камералық хорының орындауында Нұрғиса Тілендиевтің қазақ музыкасының алтын қорына енген шығармаларын тыңдайды. Сондай-ақ, көрермендерге ерекше шығармашылық эксперимент ұсынылады: көне қазақ халық аспаптарының үнімен қатар, «Vivo per lei», «The Prayer», «Melodramma», «Remember», «She» және «Шиндлер тізімі» фильмінен композициялар орындалады.
Сахнада елімізге танымал өнер иелері өнер көрсетеді. ҚР еңбек сіңірген қайраткерлері Светлана Айтбаева мен Азамат Жылтыркөзов, халықаралық және республикалық байқаулардың лауреаттары Нұрғалым Аманбай, Фархат Кубиев, Толғанай Пазылақын, Ербол Тәжібаев. Сонымен қатар, дәстүрлі ән өнер иесі Өзгеріс Шерікбай , халықаралық байқаулардың лауреаты Фируза Рахметова көрермендерге өз өнерін ұсынады.
Көрермендер жаңа жарық технологиялары арқылы жүзеге асатын керемет шоуды тамашалайды. Сахналық жабдықтар музыка сиқырын сезінуге мүмкіндік беретін ерекше атмосфера сыйлайды.
«ОТЫРАР САЗЫ ШАҚЫРАДЫ!» концертінің дирижерлері:
Н. Тілендиев атындағы АФЭО «Отырар сазының» көркемдік жетекшісі және бас дирижері – ҚР еңбек сіңірген қайраткері, «Құрмет» және «Парасат» ордендерінің иегері Дінзухра Тілендиева;
Н. Тілендиев атындағы АФЭО «Отырар сазы» оркестрінің дирижері – ҚР еңбек сіңірген әртісі, «Құрмет» орденінің иегері Жалғасбек Бегендіков.
Симфониялық оркестрдің дирижері – «Құрмет» орденінің иегері Арман Жайым.
Көркемдік жетекшілер:
Симфониялық оркестрдің көркемдік жетекшісі және бас дирижері – ҚР Халық әртісі, «Құрмет» орденінің иегері Абзал Мұхитдин;
Камералық хордың көркемдік жетекшісі және бас дирижері – ҚР еңбек сіңірген қайраткері Гүлмира Құттыбадамова.
Концерт Астана қаласы әкімдігінің қолдауымен өтеді. Билеттерді ticketon.kz сайтынан және Еркеғали Рахмадиев атындағы мемлекеттік академиялық филармония кассасынан алуға болады.
