Астанадағы Абай Құнанбайұлы атындағы №87 мектеп-гимназияда Алаш арысы Міржақып Дулатұлының туған күніне орай «Алаш – ұлтты оятқан рухты сөз» рухани іс-шарасы өтті. Аталмыш орта білім беру орны, «Ә.Бөкейхан. Алаш» ҒЗИ, Qyr balasy ҚҚ бірлесіп ұйымдастырған іс-шараға Астана қаласы Әдістемелік орталығы қолдау көрсетті.
Іс-шара аясында Qyr balasy қоғамдық қоры кітаптарының тұсауы кесілді. Атап айтқанда, «Алаш кітапханасы» сериясы бойынша Нұғыман Манай, Ғазымбек Бірімжанның шығармалар жинағы, «Жетісудағы Алаш тарихы: Жаркент іздері», «Қаныш Сәтбаев феномені» зерттеу еңбектері, «Ұлтты оятқан ұлы сөз» сериясы бойынша Әлихан Бөкейхан, Ахмет Байтұрсынұлы, Міржақып Дулатұлы, Халел Досмұхамедұлы, Мұстафа Шоқай сынды Алаш зиялыларының нақыл сөздері кітапша түрінде шығып, таныстырылды.
Әдеби жиынға Қайсар Әлім, Айгүл Ісмақова, Ербол Тілешов, Марат Әбсемет, Сұлтанхан Аққұлы, Шолпан Тілепина, Сағымбай Жұмағұл, Алмас Жұмағали, Қайырбек Кемеңгер, Алма Сайлауқызы, т.б. алаштанушы-ғалымдар мен Роза Бақтығалиқызы, Ризабек Кемеңгер, Камлет Баяхметұлы және басқа да Алаш зиялыларының ұрпақтары, «Міржақып. Оян, қазақ» фильмінде Алаш қайраткерінің бейнесін сомдаған актер Бақыт Хаджыбаев арнайы қатысты. Астанадағы 20-дан астам мектепке Алаш қайраткерлерінің аты берілді. Қонақтардың арасында сол мектептердің директорлары мен мұғалімдері де болды.
Qyr balasy қоғамдық қорының президенті Жанболат Абайхан мен құрылтайшысы Ертай Біләл жаңа кітаптарды таныстырып, краудфандингке үлес қосқан азаматтарға кітап табыстады. «Ә.Бөкейхан. Алаш» ҒЗИ директоры Ұшқын Сәйдірахман «Алаш мұрасын оқыту – ұлттық тәрбие өзегі» тақырыбында баяндама жасады.
Іс-шара барысында Ербол Тілешов пен Роза Бақтығалиқызына «Алаш зиялысы» медалі, Шолпан Тілепина, Камлет Баяхметұлы және Мұрат Ескендірұлына «Барлыбек Сырттанұлы» медалі табысталды. Қала мектептерінің белсенді, үздік 20 оқушыға «Алаш стипендиясы» тапсырылды.
Абай Құнанбайұлы атындағы №87 мектеп-гимназия оқушылары Міржақып Дулатұлы туралы «Азаматы Алаштың» атты қойылым қойды. 11 «ә» сынып оқушысы Саяжан Азаматқызы қазақ тілінің мәселесі көтерілген
«Қазақ тілінің мұңы» мақаласын, бастауыш сынып оқушылары Алаш арыстары туралы өлеңдер оқыды. Интеллектуалды сұрақтар қойылып, жеңімпаздарға кітаптар сыйға тартылды. Жас суретші, қор мүшесі Назерке Болатқызының сурет көрмесі және қор кітаптарының көрмесі қойылды.
Келесі жылы Міржақып Дулатұлының туғанына 140 жыл толады. Іс-шара барысында оған қазірден бастап дайындалу, тиісті алғышарттарды жасау, мерейтойды лайықты деңгейде атап өту мәселелері айтылды.
Аманғали ҚАЛЖАНОВ
