«Астана бас жоспары» ғылыми-зерттеу жобалау институтының бас директоры Руслан Жақыпов елордада реновация бағдарламасының іске асу барысымен таныстырды, деп хабарлайды astana-akshamy.kz.
«Бас жоспарда ескі объектілерді сүру бағдарламасы қарастырылған. Сүрілген ескі объектілердің орнына әлеуметтік объектілер, тұрғын үйлер және көшелер салу жоспарланған. Жобада аясында 2035 жылға дейін шашамен 2 мың гектар жердегі ескі құрылысты сүру қарастырылған.
Жұмыс кезең-кезеңімен жүреді, алғашында 494,2 гектар, екінші кезеңде 1019 гектар және үшінші кезеңде 465,6 гектар көлемде объектіні сүру көзделген», – деді Руслан Жақыпов елорда мәслихаты жанындағы қоғамдық кеңес отырысында.
Оның айтуынша, реновация қарқыны инвестицияға және елдегі макроэкономикалық жағдайға байланысты.
«Жалпы елорданың бас жоспары аясында 2024-2030 жылдар аралығында 673 тұрғын үй объектісі, 201 білім беру және 131 коммерциялық объекті салынады. Сонымен қатар 337,2 шақырым жол және 333 шақырым инженерлік желі салынады және қайта жөнделеді», – дейді ол.
Елорданың бас жоспары аясында қанша тұрғын үй салынатыны белгілі болды.
Сондай-ақ 2025 жылы Астанада кәріз суын тазалайтын жүйе құрылысы салынатынын хабарлаған едік.
Айта кетейік, бүгін Астана бас жоспары мекемесінің қабырғасында қоғамдық кеңес отырысы өтті. Ол жерде елорданың 2035 жылға дейін бас жоспарын іске асыру барысы талқыланды. Жобаның мақсаты – жинақы әрі тиімді қала құру.
