Елордалық еріктілер есірткі сату туралы жарнамалар жазылған қабырғаларды бояп, азаматтарға есірткі заттарының зияны туралы жазылған брошюралар таратты, деп хабарлайды www.astana-akshamy.kz/
«Астана – есірткісіз қала» жобасы аясында өткен акция қаланың Алматы ауданында ұйымдастырылды.
Іс-шараның мақсаты – есірткі заттарының адам өміріне тигізер зиянын түсіндіру, теріс әдеттерден аулақ болу, саламатты өмір салтын ұстануға бағыттау.
Сондай-ақ бұл іс-шара қала мүлкіне ұқыпты қараудың маңыздылығына халықтың назарын аударды. Тыйым салынған заттарды жарнамалау жастардың өміріне қауіп төндірумен қоса, қаланың әдемі көрінісін бұзады.
«Біз есірткі заттарының таралуына қарсы күреске бағытталған ауқымды акцияны өткізіп жатырмыз. Іс-шара өскелең ұрпақтың өмірге саналы көзқарасын қалыптастыруды мақсат етеді. Сондай-ақ акция барысында азаматтарға есірткі заттарының зияны туралы брошюралар таратылды», – деді полиция майоры Жәнібек Исаев.
Акцияға Алматы ауданы әкімдігінің, жергілікті полиция қызметі басқармасының, қалалық есіркті қылмысына қарсы іс-қимыл басқармасының және «Астана жастары» жастар ресурстық орталығының еріктілері қатысты.
Айта кетейік, мұндай акция елорданың барлық ауданында ұйымдастырылуда.
