Тәуелсіздік – халқымыздың сан ғасырлық арманы мен күресінің жемісі. Бұл қазақ халқының тарихындағы ең маңызды бетбұрыстардың бірі болды, себебі ол тек саяси ғана емес, сонымен қатар рухани, мәдени, экономикалық тәуелсіздікке жол ашты.
Мәдениет пен тіл мәселесінде тәуелсіздік қазақ тілінің мәртебесін арттырып, ұлттық бірегейлікті нығайтуға мүмкіндік берді. Қазақ халқы өзінің тарихи мұрасын жаңғыртып, салт-дәстүрлерін қайта жандандырды. Бұл – тәуелсіздіктің ең жарқын жетістіктерінің бірі.
Қазақстанның тәуелсіздігі қазақ өнерінің дамуына жаңа тыныс беріп, шығармашылық еркіндікті нығайтуға үлкен мүмкіндік жасады. Қазақ өнері ұлттық болмысты жаңғырту, тарихи мұраны қайта қарастыру және заманауи бағытта даму мүмкіндіктерін пайдалана бастады. Бұрын кеңестік идеологияның шектеуінде қалған халықтық өнер мен дәстүрлі мәдениет қайтадан жанданды. Айтыс өнері, қазақтың күй және ән өнері жаңа белестерге көтерілді. Қазақ өнерпаздары мен шығармашылық ұжымдары халықаралық фестивальдерге, көрмелерге, конкурстарға қатысып, ұлттық өнерді әлемге танытты.
Тәуелсіздік өнердің дамуына мемлекет тарапынан қолдау көрсетуге жол ашты. «Мәдени мұра» бағдарламасы, ұлттық театрлардың жаңа ғимараттарының салынуы, өнер саласындағы гранттар мен стипендиялар – осының бәрі өнердің дамуына ықпал етті. Сонымен бірге, тәуелсіздік жеке шығармашылық бастамаларды жүзеге асыруға мүмкіндік берді, бұл әсіресе тәуелсіз суретшілер мен музыканттарға жаңа көкжиектер ашты. Қазақстанның тәуелсіздігі қазақ өнерінің ұлттық және жаһандық деңгейде дамуына тың мүмкіндіктер берді. Ендігі міндет – осы жетістіктерді сақтап, жаңа ұрпаққа жеткізу.
Тәуелсіздік – тек бір күндік мереке емес, ол ұрпақтан ұрпаққа мұра болып қалатын қасиетті құндылық. Оны сақтау және дамыту – әрбір қазақстандықтың борышы. Алда тұрған міндет – егемендігімізді нығайтып, бейбіт әрі гүлденген қоғам құру.
Риза ҚАЙЫРБАЙҚЫЗЫ,
Қазақстанның еңбек сіңірген қайраткері, «Құрмет» орденінің иегері, әнші
