Елорданың «Жанұя» отбасы институтын қолдау орталығында жаңа жылдық қайырымдылық шыршасы өткізілді, оған халықтың әлеуметтік осал топтары мен мүгедектігі бар 100-ге жуық бала қатысты, деп хабарлайды astana-akshamy.kz
Мерекенің басты мақсаты – отбасылық құндылықтарды нығайту, достық атмосфера құру және оның ерекшеліктеріне қарамастан әр бала үшін тең мүмкіндіктерге баса назар аудару.
«Бүгін біз «Жанұя» отбасы институтын қолдау орталығы мен «Жансая» әлеуметтік қызмет көрсету орталығының қызмет алушылары үшін, атап айтқанда өмірлік қиын жағдайға тап болған отбасылардан шыққан балалар мен мүгедек балалар үшін жаңа жылдық ертеңгілік өткіздік. Іс-шара бағдарламасында Қуыршақ театрының шығармашылық ұжымының өнер көрсетуі, би нөмірлері қарастырылған. Сонымен қатар, елордалық қоғамдық қорлардың қолдауымен біз сыйлықтар, азық-түлік себеттері мен тәттілер дайындадық», – деді Астана қаласы әкімдігінің «Жанұя» отбасы институтын қолдау орталығының директоры Бақтияр Айтпаев.
Мерекелік іс-шарада балалар мен ата-аналар ертегі кейіпкерлерінің қатысуымен дөңгелек би мен театрландырылған қойылымға қатысты.
«Біздің орталықта 640-қа жуық қызмет алушы бар. Бүгінгі жаңа жылдық іс-шараға 40-қа жуық бала қатысты. Біз олардың қоғамда әлеуметтенуі үшін осындай мерекелік іс-шараларды үнемі өткізуге тырысамыз. Біз бұған дейін экскурсияларға және басқа да іс-шараларға қатысқанбыз. Жаңа жыл – балалар асыға күтетін ерекше мереке, біздің міндетіміз – оларға қуаныш сыйлау және қатарластарымен байланыс орнатуына мүмкіндік беру», – деп атап өтті Астана қаласы әкімдігінің «Жансая» әлеуметтік қызмет көрсету орталығы директорының арнаулы әлеуметтік қызметтер көрсету жөніндегі орынбасары Жәнібек Жандуллаев.
Мереке соңында балаларға қайырымдылық сыйлықтар мен дәстүрлі тағамдар табысталды.
«Біз бір жылдан бері «Жанұя» орталығының қамқорлығындамыз. Жұмыспен қамтылғанына қарамастан, біз тренингтерге қатысуға тырысамыз. Бүгін біз алғаш рет орталық ұйымдастырған жаңа жылдық ертеңгілікке келдік. Ұйымдастырушыларға мерекелік көңіл күй, балаларға қуаныш сыйлағаны үшін алғыс айтамыз», – деп атап өтті елорда тұрғындарының бірі.
