«Астана – есірткісіз қала» акциясы аясында елордада есірткі заттарын сату туралы хабарландырулары бар қабырғаларды бояу жұмыстары жүргізілді, деп хабарлайды astana-akshamy.kz.
Акцияны Байқоңыр ауданының әкімдігі, ауданның жергілікті полиция қызметі басқармасы, қалалық полиция департаментінің есірткі қылмысына қарсы күрес басқармасы және «Астана жастары» жастар ресурстық орталығының еріктілері ұйымдастырды.
Іс-шараның негізгі мақсаты – есірткінің көрінуін және қолжетімділігін төмендету, сондай-ақ оларды қолданудан бас тартатын қоғамдық пікір қалыптастыру, салауатты өмір салтын насихаттау.
«Жыл басынан бері елорданың барлық ауданының әкімдіктерімен бірлесіп, есірткі жарнамасы бойынша граффити бояу жөнінде 40-тан астам акция ұйымдастырылды. Біз осындай бастамаларды жалғастыруды, халықпен ақпараттық-ағартушылық жұмысты күшейтуді және жастар арасында жаман әдеттердің дамуына жол бермеуді жоспарлап отырмыз. Салауатты өмір салтын насихаттау және нашақорлықтың алдын алу – есірткінің таралуына қарсы күрестің маңызды құрамдас бөлігі», – деп атап өтті «Астана жастары» ЖРО маманы Сұлтан Өмірғалиев.
Акция 2024-2025 жылдарға арналған «Астана – есірткісіз қала» нашақорлыққа қарсы іс-қимыл және алдын алу жөніндегі кешенді іс-шаралар жоспарының бір бөлігі болды. Бұл жоспар азаматтардың есірткінің зияны туралы хабардарлығын арттыруға және олардың елордада таралуына қарсы күресуге бағытталған бірқатар іс-шараны қамтиды.
«Біз мұндай акцияларға жиі қатысамыз. Жоба аясында қабырғалардағы есірткі жарнамасын бояймыз. Біз қаланың тазалығын қолдаймыз. Мақсатымыз – мұндай жарнаманы жою ғана емес, есірткінің зияны туралы ақпаратты адамдарға жеткізу», – деп атап өтті «Астана жастары» ЖРО еріктісі Даниял Келгінбаев.
Ұйымдастырушылар мұндай бастамаларды жалғастыруға, еріктілерді көбірек тартуға және жастармен жұмысты күшейтуге ниетті.
