Астана қаласындағы Кәсіпкерлер палатасында «СПК Астана» акционерлік қоғамының өкілдерімен шағын өнеркәсіп аймақтарын дамыту мәселелеріне арналған маңызды кездесу өтті, деп хабарлайды astana-akshamy.kz
Кездесу шағын өнеркәсіп аймақтарының жұмысын жақсарту стратегиясын талқылау және оларды одан әрі дамытуға қатысты ұсыныстар жасауға бағытталды.
Мұндай бастамалардың кәсіпкерлік белсенділікті қолдаудағы маңызы зор. Бұл әсіресе шағын және орта кәсіпкерлік өкілдері үшін өте маңызды, өйткені шектеулі ресурстар жағдайында оларға бизнесті жүргізуге қолжетімді және сапалы алаңдар жетіспей жатады.
«СПК Астана» АҚ-ның шағын және орта кәсіпкерлікті дамыту департаменті директорының орынбасары Әлібек Әубәкіров шағын өнеркәсіп аймақтарының қазіргі жағдайы, олардың мүмкіндіктері мен жұмысын оңтайландыру бойынша ұсыныстар туралы баяндады.
Кездесу барысында қатысушылар бар аймақтарға қатысты өз ұсыныстарын айтып, алдағы даму перспективалары туралы сұрақтар қойды. Барлық пікірлер мен ұсыныстар кездесудің хаттамасына енгізіліп, атқарушы органдарға әрі қарай қарастыру үшін жолданатын болады. Бұл кәсіпкерлердің қажеттіліктерін ескеріп, мемлекеттік саясат пен шағын өнеркәсіп аймақтарының инфрақұрылымын жақсартуға ықпал етеді.
