№1 балалар музыка мектебінің 35 жылдығы аясында аталған мектептің ұлағатты ұстазы, ақын, әнші, сазгер, күйші, «Құрмет» орденінің иегері Оспан Сүлейменұлының білім саласына сіңген еңбегінің 60 жылдығына арналған «Ғасырлар пернесі» атты құттықтау кеші өтті.
Іс-шара аясында экраннан кеш иесінің өмір дерегінен сыр шертетін бейнесюжет көрсетілді. Әрі қарай қонақтар сөз алып, оның білім мен мәдениет саласына сіңірген еңбегінің зор екенін айтып, кеш иесін құттықтады.
– Оспан ағайымыз – білім беру саласында қажырлы еңбек етіп, ұзақ жылдар бойы балаларға домбыра пәнінен сабақ беріп, көптеген шәкірт тәрбиелеген және олардың жетістіктеріне куә болған адам. Біз ағамызды қазақ руханиятының жоқшысы, ағартушылық саласының адуынды қайраткері ретінде танимыз. Өйткені Оспан ағамыз – ешкімге айғайламай-ақ, кеудесін кермей-ақ, Ақмоладағы алғашқы ұлттық қазақ музыка мектебінің негізін қалаған азамат. Әрине, оны жүзеге асыру оңайға соқпағанын білеміз. Алайда ағамыз алған бетінен қайтпады. Көк мұздай сірескен Целиноградта қазақтың өнерін ту қылып желбіретті. Сол заманнан-ақ ұлтына үнсіз қызмет ете білді. Сондықтан біз бұл кісінің еңбегі қандай құрметке болса да лайық деп бағалаймыз, – деді №3 балалар мектебінің директоры Гүлмира Жангелді.
Оспан Сүлейменұлының ұстаздық жолындағы атқарған өлшеусіз еңбегі туралы айтқан кеш қонақтары кеш иесіне деген ықыласын құшақ-құшақ гүлдермен жеткізді. Сондай-ақ кеш барысында «Жігер» хор ұжымы, №67 мектеп ұстаздарының триосы автордың өз әндерін әуелетсе, «Серпер» ансамблі ақын, ҚР оқу ісінің үздігі Қайырғали Әбішевтің Оспан Сүлейменұлына арналған «Ғасырлар пернесі» күйін орындады.
