27 наурыз – Дүниежүзілік театр күні. Бұл тек өнер адамдарының ғана емес, сахнаның артында қызмет ететін жандардың да кәсіби мерекесі. Елорданың танымал театрларда саналы ғұмырын жұмысшы мамандығына арнаған көптеген білікті мамандар бар. Олардың арасында «Астана Опера» театрының тігін цехының қызметкерлері бар, деп хабарлайды astana-akshamy.kz
Театрдың тігін цехында тігіншілер, олардың көмекшілері, технологтар, мамандар және цех меңгерушісі бар 20 адам жұмыс істейді.
Бас киімдер тігетін Дина Жакиенова бұл салаға осыдан 43 жыл бұрын келген. Оның жартысын театрдың тігін шеберханасында жұмыс істеуге арнады. Алғашында К.Байсейітова атындағы Ұлттық опера және балет театрында жұмыс істеген ол 2013 жылы елордадағы «Астана Опера» театры ашылғанда бір топ әріптесімен осында ауысқан.
«Театрдың бұл жұмысы жеке тігіншінің ғана жұмысы емес. Біз костюм суретшілері жасаған эскиздер бойынша жұмыс істейміз. Осыған байланысты италиялық костюм бойынша суретші, «Достық» орденінің кавалері Франка Скуарчапиномен, Қазақстанның еңбек сіңірген қайраткерлері Софья Тасмағамбетовамен, Павел Драгуновпен және басқа да танымал дизайнерлермен тығыз жұмыс істейтінімізді атап өткім келеді. Сахнада әртістер өздерін жайлы сезінуі керек және біз костюмдерді олардың талабына сәйкестендіру үшін бар күшімізді саламыз», – дейді Дина Жакиенова.
Костюмдермен салыстырғанда бас киімдерді тігудің бір ерекшелігі – мұнда тек қолдың шеберлігі қажет. Өткен ғасырдың 80-жылдарында Дина Жакиенова алдымен Арқалықтағы техникалық училищеде ерлер киімін тігуді меңгерген, содан кейін Шымкентте бас киім тігу бойынша бес айлық курстан өтті.
«Егер тігін тігуге деген сүйіспеншілік болса, бәрін жасай аласыз: киім де, бас киім де. Жұмыс көңілді болған кезде кез келген қиындыққа мән бермейсіз. Жастарға мынаны айтқым келеді: ешқашан жұмысшы мамандықтан қорықпаңыз. Тігінші – үлкен құрметке лайық мамандықтардың бірі», – дейді ол.
Әріптесінің көзқарасын костюм тігу шебері Гүлбан Мұқанова да жалғады, ол өз өмірін тігін ісіне арнады.
«Жұмыс барысында қиындықтарды байқамаймыз, ал костюм дайын болғанда жұмысымызға мақтанышпен қараймыз. Сол сияқты қолыңызбен тігілген костюмдерді киген әртістерді көргенде ерекше қуанасыз. Бір костюм – көптеген мамандар – дизайнерлер, технологтар, тігіншілер жұмысының нәтижесі», – дейді шебер.
Ине мен жіптен бөлек, тігіншінің негізгі құралы – тігін машинасы. Гүлбану Мұқанова өзінің карьерасын 40 жыл бұрын бастаған кезде машиналар мүлдем басқаша болғанын айтты.
Бас киім тігуші Дина Жакиенова мен костюм тігу шебері Гүлбану Мұқанова биыл зейнеткерлік демалысқа шығады. Қазір олар өз білімдері мен тәжірибелерін жас мамандарға белсенді түрде үйретіп жүр. Осыған байланысты, «Астана Опера» жанында театр қолөнерінің балалар студиясы жұмыс істейді, онда қыздар тәжірибелі тәлімгерлерден тігін шеберлігін меңгереді. Болашақта бұл жас таланттар жұмысшы мамандықтарының бірін игеретініне сенімділік бар.
