«Жұмысшы мамандықтары жылы» аясында елордалық оқушыларға еңбек адамының абырой-беделін үлгі ету, еңбекқор және нағыз маман болу идеясын жеткізу кең сипат алып келеді.
Жас ұрпақтың ой-санасына тәжірибелі мұғалімдер «Біртұтас тәрбие» бағдарламасының мән-маңызын жеткізіп, «Жұмысшы мамандықтары жылы» аясында жұмысшы мамандардың қоғамдағы беделін арттыруға ықпалдасып, «Адал азамат» идеясын жан-жақты түсіндіріп келеді.
Бурабай төрінде өткен Ұлттық құрылтайдың төртінші отырысында Президентіміз отаншыл, білімді, жасампаз ұрпақ тәрбиелеу керек екенін тағы бір еске салды. Демек бұл бағыттағы жұмысымызды үздіксіз жалғастыра береміз.
Жеткіншектердің бойында шығармашылық қабілетті дамыту, әлеуметпен бірге жұмыс істеуге дағдыландыру, тұла бойда жасырынып жатқан өнерді шыңдау – көркем еңбек пәнінің міндеті.
Сол себепті сабақ барысында сурет салу, декор жасау және безендіру, ереже жазумен шектеліп қалмай, ұл балаларға келешекте тұрмыста қажетіне жарар ағаш өңдеу өнерін, темірмен (металл) жұмыс істеу негіздерін үйретеміз. Оқу жылының басында материалдық-техникалық базамыз заман талабына сай келетін лазер станогымен толықты. Осылайша, техникалық қауіпсіздік ережесін сақтай отырып, ағаш, фанера, ПВХ материалы, органикалық шыныдан түрлі бұйымдар жасап жүрміз. Мысалы, ұлттық құндылықтарды дәріптеуге бағытталған «Біртұтас тәрбие» бағдарламасының негізінде 5-сыныптың оқушылары ою-өрнек ойса, 6-сыныптар қазақтың зергерлік бұйымдары – сырға, білезік, сақина жасап жүр. Ал 7-8-сыныптың ұлдары сәл күрделі заттар жасауға машықтанып қалды: бесік, себет тоқу, астаналық ғимараттардың макеті және т.б.
Кәсіби маман даярлауды бүгіннен бастау, анығын айтқанда, мектеп қабырғасында қолға алу анағұрлым тиімдірек. Бұлай дейтін себебіміз, жиналыстарда ата- аналар тарапынан айтылған ұсыныстарға құлақ асып, былтыр іске қосылған жобаның биыл сәтімен жүзеге асқанын атап өткен жөн. Астана қаласы әкімдігінің Техникалық колледжімен жасалған меморандум шеңберінде 10-11-сыныптың ер-жігіттері «дәнекерлеу ісі» мамандығын игерді. Куәлік алып үлгерген бірінші лектің оқушылары өскенде білікті мамандар қатарын толықтыруға әзір. Міне, білім мен білік дәуір құрған ХХІ ғасырда заманауи инновациялық технологиялар мен тенденциялар, адал еңбек ел көшін алға сүйрейтін қуатты күшке айналғаны да сондықтан.
Ақжан АМАНТАЙҰЛЫ, Астана қаласы
Әлкей Марғұлан атындағы №40 мектеп-лицей мұғалімі
