Бейбітшілік және келісім сарайында «Ұлттық құндылықтар: салттың сырлы бейнесі» атты республикалық шығармашылық байқауының жеңімпаздарын марапаттау салтанаты өтті.
Іс-шараның негізгі мақсаты – бейнелеу өнері арқылы ұлттық құндылықтар мен мәдени нысандарды насихаттау, сондай-ақ отандық суретшілердің шығармашылығын қолдау және патриоттық рух пен ұлттық бірегейлікті қалыптастыру. Байқауға Қазақстан өңірлерінен 137 кәсіби суретші қатысты. Олар қазақтың мәдени құндылықтарын шебер бейнелеп, өз еңбектерін пейзаж, натюрморт және сюжетті картина жанрларында ұсынды.
Байқау қорытындысы бойынша қазақтың салт-дәстүрлері мен әдет-ғұрыптарына ерекше көркемдік көзқарас бейнеленген үздік жұмыстар таңдалды. Бұл туындылар заманауи көркемдік техникалар мен дәстүрлі мотивтерді үйлестіріп, ұлттық мұраны жаңаша пайымдайды.
Бас жүлдені Оралбек Қабокеге «Өмір есігі» картинасы үшін берілді. I орынды Қами Айтқалиев («Ас» картинасы), II орынды Үміт Жұбанышева («7 күлше»), III орынды Әсет Жақыпбек («Ақ күйме») иеленді.
Байқау аясында қазақ халқының ұлттық құндылықтарын жан-жақты көрсететін көрме ашылды. Қонақтар қазақ халқының дәстүрлері, тұрмысы мен философиясының заманауи көрінісін тамашалай алады. Көрме екі ай бойы жұмыс істейді.
