Кеше Астанадағы Ұлттық академиялық кітапханада мемлекет және қоғам қайраткері, Сенаторлар кеңесінің мүшесі Қуаныш Сұлтановтың «Қазақтың Қонаевы» және дипломат, журналист-жазушы Гүлсім Еңсеповамен бірлесе жазған «Отыз жылдың ой толғауы» атты кітаптарының таныстырылымы өтті.
Зиялы қауым өкілдері қатысқан жиынның шымылдығын ашып, жүргізіп отырған мемлекет және қоғам қайраткері Дархан Мыңбай көзі тірісінде-ақ ерен еңбегі еленіп, халық көсеміне айналған Дінмұхамед Қонаевтың орны бөлек екенін айта келе, мемлекеттік басқару ісіндегі ар мәселесі төңірегінде ой қозғады.
Алып тұлғаның көзін көрген мемлекет және қоғам қайраткері, әдебиеттанушы ғалым, Мемлекеттік сыйлықтың лауреаты Мырзатай Жолдасбеков өз естеліктерімен бөлісіп, «өтірік айтпа, уәде берме, берсең орында!» деген Дінмұхамед Қонаевтың өсиетін де айтып өтті.
«Ұлт және қоғам қайраткері Қуаныш Сұлтанов қалың жұртшылыққа бір емес, екі кітабын ұсынып отыр. Бұл жинақтар мазмұндық жағынан да, тақырыптық тұрғысынан да өзара сабақтас. Екеуі де талай азаматтың маңдай тері тоқтамай төгілген мемлекет ісіне арналған. Тек бір-бірінен айырмашылығы – алғашқысы жеке адам туралы болса, екіншісі ел дамуының белестері жөнінде ой тербетеді. «Қазақтың Қонаевы» атты кітаптың авторы өз кейіпкерімен қатар қызмет істеді, тәрбиесін көрді, тәлімін алды. Ол бұл кітабында кейіпкеріне баршаға танымал лауазымды тұлға емес, қалың елде жатқан қарапайым адам ретінде қарауға ден қояды. «Отыз жылдың ой толғауы» кітабын ел мен жер, ұлт пен жұрт туралы байсалды байыптама деуге болады. Осы орайда журналист пен қаламгер арасында сұхбатта ел өміріндегі елеулі оқиғаларға деген көзқарастар жиынтығы көрініс табады» деді өз сөзінде Президент кеңесшісі, Ұлттық ғылым академиясының академигі, белгілі қаламгер Бауыржан Омарұлы.
Аталмыш еңбектер туралы пікір білдірген мемлекет және қоғам қайраткері, дипломат Әділ Ахметов «кез келген іргелі мемлекеттік тұлға өзі өмір сүрген дәуірдің айнасы» деп, кітаптың шындыққа негізделгеніне баса мән беріп, бүгінгі мектеп оқушыларынан бастап барша жасқа дәріптелуі керек екенін атады.
– Кемел тарих – көркем келешектің бастауы. Тарих ұлтты тәрбиелейді. Кейде мемлекетімізде саяси идеология жоқ деген жаңсақ пікірлерді естіп жатамыз. Меніңше, бұл – негізсіз айтылған сөз. Қазақ елі үшін жалғыз идеология бар, ол – тәуелсіздік. Ендеше сол тәуелсіздік тарихының бірден-бір жаршысы – Қуаныш Сұлтанұлының еңбектері осы мақсатта қосқан үлесі деп бағалаймыз, – деді мемлекет және қоғам қайраткері Қырымбек Көшербаев.
Жиын барысында мемлекет және қоғам қайраткері, дипломат Сайлау Батыршаұлы мен Қарулы күштердің ардагері, отставкадағы генерал-лейтенант Абай Тасболатов заман ағымы, тәуелсіздік тарихы төңірегінде ой өрбітті.
Индира Бержанова
