Көктем мезгілінің келуімен елорданың коммуналдық қызметтері қаланы ауқымды санитарлық тазалауды бастады. Осылайша қоршаулар, аялдамалар, жарықтандыру бағаналары, жол белгілері, жолдар, тротуарлар және басқа да нысандар тазартылмақ.
Жекелей айтсақ, Байқоңыр ауданында санитарлық тазалау жұмысы жүргізілуде. Көпірлер, қоршаулар, аялдамалар, жаяу жүргіншілер жолы, жол жиектері мен белгілері күн сайын жуылады. Тұрғындардың қауіпсіздігін қамтамасыз ету мақсатында ағаштарды санитарлық кесу жұмыстары да басталған. Сондай-ақ көгалдандыру алаңдарын дайындау, жөндеу-қалпына келтіру жұмыстары жүргізілуде. Оның ішінде көпірлер мен қоршауларды, балалар ойын алаңдарын сырлау, қоқыс жәшіктері мен контейнерлерді жөндеу, т. б. бар. Аудан бойынша санитарлық тазалау жұмысына 123 арнайы техника мен 470 жол қызметкері жұмылдырылған.
Мұндай жұмыстар Алматы ауданында да жүргізілуде. Ағаштарды балақтау, аялдамаларды санитарлық тазалауға ерекше көңіл бөлінуде. Ауқымды жұмыстар қалалық жайлы ортаны құруға бағытталған. Жұмысқа 145 арнайы техника мен 320 жол жұмысшысы қатысуда.
Нұра ауданында тазалауға 140-тан астам арнайы техника мен 400-ден астам жол қызметкері жұмылдырылған. Жол инфрақұрылымының негізгі бөліктері – аялдамалар, жол белгілер, бағдаршамдар, көпірлер, тротуарлар, қоршаулар тазартылған. Көгалдандыру ретке келтіріліп, ағаштарды балақтау жұмысы жүргізіліп жатыр.
Сарайшық ауданында да жаяу жүргіншілер жолы жуылып, ағаштардың жоғары жағы кесіліп, маңайы тазартылып қана қоймай, жасыл желектерді отырғызу үшін орындар дайындалуда. Ауданда күн сайын санитарлық тазалауға 130 арнайы техника мен 350 жол жұмысшысы еңбек етуде.
Сонымен қатар, Есіл ауданында жаяу жүргіншілер жолын тазалау және жуу жұмыстары жалғасуда. Ауданда жалпы ұзындығы 159 мың метрді құрайтын 140-тан астам көше бар. Жаяу жүргіншілер жолының ауданы 1,3 миллион шаршы метрден асады, ол орындарда күн сайын тазалау жұмысы жүргізіліп жатыр.
Сарыарқа ауданында санитарлық тазалау жұмыстары қарқынды жүргізілуде. Өнеркәсіптік суды пайдаланып, жолдарды, тротуарларды, көпірлерді, қоршауларды, аялдамаларды жуу жалғасуда. Жарықтандыру тіректері мен көше жиһаздары да жуылады. Сондай-ақ ауданда субұрқақ құрылыстарын тазарту жұмыстары да басталған.
Жалпы бүгінде елорданың барлық алты ауданында санитарлық тазалау жұмыстары жүргізілуде. Арнайы техниканың көмегімен тротуарлар мен жол жабындарын механикаландырылған тазалау жұмыстары қарқынды. Көгалдандыру қызметкерлері күн сайын көгал алаңдарын қоқыстан тазартуға жұмылдырылады. Қолмен және техниканың көмегімен жол жиегі тазаланады. Сондай-ақ коммуналдық күштер еріген қалдық суды сору жұмысын да жүргізуде.
Ержан ҚОЖАС
