Астана қаласының әкімі Жеңіс Қасымбек Instagram парақшасында тамыз конференциясында көтерілген мәселелер туралы жазды, деп хабарлайды astana-akshamy.kz.
«Жаңа оқу жылының басталуына екі аптадай уақыт қалды. Бірінші сыныпқа баратын оқушылар үшін өміріндегі жаңа әрі жауапты кезең басталады, ал жоғары сынып оқушылары үшін — болашақ мамандығын анықтайтын уақыт. Ұстаздарымыз балаларымызға білім беріп қана қоймай, олардың әлеуетін ашуға, бойындағы ерекше қасиеттерін танытуға көмектеседі. Бүгін дәстүрлі 2024 тамыз форумы өтіп, негізгі бағыттар талқыланды», — деп жазды Жеңіс Қасымбек.
Әкімнің айтуынша, бірінші білім ошақтарына баса назар аударылып отыр.
«Қала тұрғындарының жыл сайынғы өсімін ескере отырып, елордада мектептер көптеп салынып жатыр. Қазіргі уақытта екі ауысымда 100 мыңға жуық оқушыға арналған 30-дан астам мектептің құрылысы жүріп жатыр. Жаңа оқу жылы ішінде 20-дан астам мектеп ашамыз. Олардың бір бөлігі — жайлы мектептер. Мемлекет басшысының тапсырмасы бойынша „Жайлы мектеп“ ұлттық жобасы аясында Samruk-Kazyna Construction 90 мың оқушы орнына арналған 24 жайлы мектеп (2024-2025 жылдар аралығында) салады», — деп жазды қала әкімі.
Жеңіс Қасымбектің жазуынша, бұдан өзге мемлекеттік балабақшалардың құрылысы қайта жанданды, бұған қоса жеке балабақшаларға мемлекеттік тапсырыс беру ары қарай жалғасады.
Екінші. Кадрлар даярлау
Жыл сайын біз колледждерге де, жоғары оқу орындарына да гранттар бөлеміз. Биыл ЖОО-ға 850-ге жуық грант бөлдік. Сондай-ақ, педагогтарымызды біліктілігін арттыруға жібереміз.
Үшінші. Әлеуметтік көмек
Жалпыға бірдей оқыту аясында 12 мыңнан астам оқушы көмек алды. Ал материалдық көмек мөлшері 43 мың теңгеден асады. Сонымен қатар, мектеп киімін сатып алуға арналған өзге де бағдарламалар бар, оның ішінде демеушілік қаражат та тартылады.
Төртінші. Студенттік жатақханалар
«Жауапты министрлікпен, университеттермен, инвесторлармен бірлесіп, жатақханаларда орын санын арттыру бойынша жұмыс істейміз. Биыл Астанада 4,5 мың орынға арналған 6 студенттік жатақхана салынады. Тағы 4 университетке жатақхана салу үшін жер телімдері бөлінді. 2025 жылы тағы 2 жатақхананы пайдалануға беру жоспарланып отыр. Осы шаралардың барлығы оқушыларымыз бен ұстаздарымызды қолдауға бағытталған. Біз тиісті жағдай жасау бойынша ары қарай да жұмыс істейміз», — деп жазды Жеңіс Қасымбек.
