«Цифрлық сот орындаушысы» іске қосылды
![](https://www.astana-akshamy.kz/wp-content/uploads/2024/08/b3439b006d54859ed2ed01db5a640809_1280x720-721x470.jpeg)
Әділет министрлігі Қазақстан Республикасының бүкіл аумағында «Цифрлық сот орындаушысын» іске қосты, деп хабарлайды astana-akshamy.kz
Бұл жүйе азаматтардың 5 миллиард теңгеден астам қаражатын үнемдеуге мүмкіндік береді.
Мұндай бастама Әділет министрлігінің бастамасымен жеңілдетілген өндірістің жаңа институты аясында халық игілігіне ұсынылып отыр.
Мемлекет басшысының тапсырмасы бойынша азаматтардың кредиттелуін төмендету және әділет органдарының жұмысын одан әрі цифрландыру бойынша заңнамаға тиісті өзгерістер енгізілді.
Бұрын қарызды уақтылы өтемеген жағдайда, азаматтар жеке сот орындаушының қызметі үшін айыппұл сомасына қосымша 25% қаражат төлеуге міндетті болған. Енді азаматтар осы шығындардан және ЖСО-на барудан босатылады. Мәселен, 20 АЕК-ке дейінгі сомада қарызы бар азаматтар EGOV Mobile-да 1414-тен іс туралы егжей-тегжейлі ақпараты бар SMS хабарламалар мен push-хабарламалар алмақ. Халыққа ыңғайлы болу үшін барлық қамтамасыз ету шаралары (тыйым салу) автоматты түрде алынып тасталып, берешекті онлайн төлеу қолжетімді болмақ. Осылайша, адами фактор толығымен алынып тасталады.
Алдын ала есептеулер бойынша жеке сот орындаушыларына қызмет ақысының 25% алып тастау есебінен жыл сайын азаматтардың қаржылық жүктемесі шамамен 5,5 млрд. теңгеге төмендейді деген болжам бар.
Осылайша сот орындаушыларымен байланысудың қажеті жоқ, барлық әрекеттер онлайн режимінде жүргізіледі және өндірісті тоқтату және қамауға алуды алып тастау үшін түбіртектер мен басқа да растайтын құжаттарды ұсынудың қажеті жоқ.
Айта кету керек, күнтізбелік 30 күн ішінде атқарушылық құжаттың (оңайлатылған іс жүргізу бойынша) талаптары орындалмаған жағдайда, іс жеке сот орындаушысына орындауға берілетін болады және одан кейінгі атқарушылық әрекеттер комиссияны өндіріп ала отырып, жалпы тәртіппен жүзеге асырылады.
Естеріңізге сала кетейік, ағымдағы жылдың 18 қаңтарынан бастап бұл жоба Тараз қаласы бойынша сынақтан өткізіліп, азаматтардың ақшалай міндеттемелерін төмендету, қағаз тасығыштан толық бас тарту және Атқарушылық іс жүргізуді орындау процесінде адами факторды алып тастау түрінде оң нәтиже көрсетті.