Елорда көшелерінің электронды паспорты әзірленуде
![](https://www.astana-akshamy.kz/wp-content/uploads/2024/08/91f7eb85-5157-4b1b-8495-703cec79e1a6-780x470.webp)
Енді Астанада әр көшенің жеке электронды паспорты болады. Бұл туралы Астана қаласы Көлік және жол-көлік инфрақұрылымын дамыту басқармасның басшысының орынбасары Мерей Байырхан мәлім етті, деп хабарлайды astana-akshamy.kz.
«Қазір елорда көшелерінің толық паспорты дайындалып жатыр. Бұл жұмыс былтыр басталды, Қазақстан жол ғылыми-зерттеу институты айналысуда. Әр көшенің электронды паспорты болады, ол жерде жөндеу жұмыстары қашан жүргізіледі, жаяу жүргіншілерге арналған жолдың ұзындығы қанша метр, тағы сол сияқты мәліметтер көрсетіледі», — деді Мерей Байырхан қалалық мәслихаттың комиссия отырысында.
Оның айтуынша, елорда көшелерін цифрландыру жұмыстары алдағы қыркүйекте аяқталады.
Айта кетейік, бүгін қалалық мәслихатында құрылыс, экология, көлік және тұрғын үй-коммуналдық шаруашылық мәселелері жөніндегі тұрақты комиссияның отырысы өтті.
Күн тәртібінде Астана қаласы мен маңындағы тұрғын алаптарында жол салу және жөндеу мәселелері қаралды.