Астанада осы демалыс күндері ауыл шаруашылығы жәрмеңкелері басталады, деп хабарлайды www.astana-akshamy.kz
Еліміздің өңірлерінен тауар өндірушілердің қатысуымен өтетін ауыл шаруашылығы өнімдерінің жәрмеңкелері әр сенбі-жексенбі күндері 27 қазанға дейін жалғасады.
21 қыркүйекте басталатын жәрмеңкеде елордада өз өнімдерін бірінші болып Ақтөбе, Атырау және Жамбыл облыстарының аграршылары ұсынады. Олар ет, балық, сүт, азық-түлік өнімдерін, сондай-ақ көкеністер мен жемістерді тікелей фермерлерден ұсынады. Бұл азық-түліктің қолжетімділігін арттыруға да, отандық өндірушіні қолдауға да ықпал етеді.
Үш облыстың ауыл шаруашылығы тауарын өндірушілер Астанаға 125 тонна ет және ет өнімдерін, 250 тонна көкеністер мен жемістерді, 26 тонна сүт өнімдерін, 22 тонна балық, 26 мың жұмыртқа, 2 тонна нан-тоқаш өнімдерін және 60 тонна өзге де азық-түлік өнімдерін әкеледі.
Жәрмеңке барысында концерттік бағдарлама да ұйымдастырылады.
Айта кетейік, биыл жәрмеңке «Қазанат» ипподромына қарама-қарсы, Қарқаралы тас жолында өтеді. Сондай-ақ елорда тұрғындары мен қонақтарына ыңғайлы болуы үшін жәрмеңкелерді өткізу кезеңінде № 18, 37, 303 және 323 автобус маршруттары қамтамасыз етіледі.
Ауылшаруашылық жәрмеңкесі сағат 9.00-ден 18.00-ге дейін жұмыс істейді.
