Астана қаласы әкімдігінің «Astana Online: Азаматтық сектор мен жергілікті атқарушы органдар арасында сенімді диалогты қалыптастыру» жобасы аясында бүгін АЭС салу мәселесі бойынша «Жалпыұлттық референдум – кең ауқымды жалпыұлттық диалогтың айқын көрінісі» тақырыбында ақпараттық-пікір талас кездесуі өтті, деп хабарлайды astana-akshamy.kz
Келелі жиын Мемлекет басшысы Қ.Тоқаевтың Қазақстан халқына Жолдауының басты қағидаларының, оның ішінде АЭС салу мәселесі бойынша Жалпыұлттық референдумның маңызды мемлекеттік шешімдер қабылдаудың жаңа үлгісі ретіндегі мәнін ашып көрсетуге, Астана қаласы тұрғындарының жаңа қоғамдық-саяси мәдениетін қалыптастыруға бағытталды.
Іс-шараға қоғам қайраткерлері, үкіметтік емес ұйымдардың, мемлекеттік және квазимемлекеттік органдардың өкілдері, сондай-ақ Астана қаласының тұрғындары мен студенттері, волонтерлер қатысты. Спикер ретінде Парламент Мәжілісінің депутаты, Халықаралық істер, қорғаныс және қауіпсіздік комитетінің мүшесі Самат Нұртаза, Қазақстанның Азаматтық альянсы президенті Бану Нұрғазиева, Alem University ректоры Сұлтан Мұқанов, А.Құсайынов атындағы Еуразия гуманитарлық институтының профессоры, кафедра меңгерушісі, тарих ғылымдарының кандидаты Самат Есқалиев, ҚР білім беру ісінің үздігі, Еңбек ардагері Ришад Михалев, PhD, экономист, халықаралық сарапшы Ерғали Мұқанұлы қатысып, атом энергетикасының артықшылықтары мен қажеттілігіне кеңінен тоқталды.
Модератор — «Ұлттық құндылықтар академиясы» Республикалық қоғамдық бірлестігінің төрағасы, химия ғылымдарының кандидаты Әділхан Төлегенұлы бұл кездесу ел дамуының маңызды мәселелерін бірлесіп талқылап, өзекті сұрақтарға жауап алуға мүмкіндік беретініне сенім білдірді.
-Еліміздің жер аумағы өте үлкен. Соның ішінде оңтүстікте Қазақстан халқының елу пайызы өмір сүреді. Сол елу пайызына энергия тапшылығы жылдан жылға қатты сезіліп келеді. Сонымен қатар көптеген жеке инвесторлар жалпы Орталық Азияға келіп, өндірістік орындар саламыз десе оған құшағымыз ашық болғанмен, оларды ең бірінші керегі электр энергиясымен толық қамтамасыз ете алмай отырмыз. Содан олар бізге келіп қаржы құйып, жоба бастауға беттемей отыр. Сондықтан елімізде атом энергетикасын дамыту қажеттілігі туындап отыр, — деді депутат С. Нұртаза. Ол атом энергетикасын дамытуды қолға алудың өзге де артықшылықтарына тоқталды. Кездесуге келген барлық спикерлер АЭС салудың тиімділігін ғылыми тұрғыда да баяндап, студенттер мен оқу орны қызметкерлерінің сұрақтарына жауап берді.
Райхан Рахметова
