Елордада Joltap жобасы сәтті жүзеге асып келеді. Ол тұрғындарға жаңа мамандықтарды тегін оқып, өз ісін ашуға, жұмыс табуға және 52 мемлекеттік қолдау шаралары бойынша кеңес алуға мүмкіндік береді.
Астаналық Айбат Муталов – осы жобаның игілігін көрген жастың бірі. Ол алдымен «Баршаға мүмкіндік» модульдік пунктіне келіп, кеңес алып, нәтижесінде мамандандырылған оқытудан өтті. Жыл басында өз ісін бастауға шешім қабылдап, дәнекерлеу жұмысымен айналысқан болатын.
– Өз бизнесімді ашпас бұрын қалай болар екен деп біраз ойландым. Бұрын жеке кәсіппен айналысып көрмегендіктен, алдымда не күтіп тұрғанын, қандай қиындықтарға тап болатынымды білмедім. Алдымен істі бастауға жүрексіндім. Бірақ жақындарымның қолдауы арқасында күмәнді еңсере алдым, – деді жас кәсіпкер.
Айтуынша, ол Астана қаласының Жұмыспен қамту орталығына жүгінген, бірақ нәтиже болмады. Кейін ол «Баршаға мүмкіндік» модульдік пунктіндегі қызметкердің кеңесімен электрмен дәнекерлеуші курсын оқуға бел буады.
– Кеңседе газбен дәнекерлеуші курсының оқу процесінен өттім. Бұл жерде мен теориялық әрі практикалық білімді қатар алдым. Сонымен бірге іс жүзінде бізге әрдайым кеңес сұрай алатын тәлімгер берілді. Кәсіпорын шығын материалдарын ұсынады, бұл – біз үшін едәуір үнем. Мен ол жерден қажетті мамандарды табамын деп ойладым, нәтижесінде мамандандырылған оқудан өзім өттім, – деді кәсіпкер.
Ол оқуға жазылу өте тез, небәрі 10 минут уақытын ғана алғанын, бір аптадан кейін оған оқу күндері туралы хабарланғанын, сөйтіп білім ала бастағанын жеткізді.
– Оқыту офлайн форматта екі аптаға созылды. Біз жұмыс күндері оқыдық, сабақ шамамен екі сағаттан болды және тек теорияны ғана емес, сонымен бірге тәжірибе де жинақтадық. Сабақта бізге осы немесе басқа қосылыстың қалай дәнекерленетінін, оттықты қандай бұрышпен және қандай жылдамдықпен жүргізу керегін көрсетті. Белгілі бір биікте оңтайлы бұрышта, электродтан жұмыс бетіне дейінгі қашықтықты сақтай отырып, олар қолды дұрыс ұстауды үйретті, – деді курс түлегі.
Жас кәсіпкер қысқа уақыт ішінде дәнекерлеу дағдысын меңгере алғанын атап өтті.
– Мұндағы қызметкерлер өте жауапты, бізге 20 жылдық тәжірибесі бар оқытушы Ербол Есенұлы дәріс берді. Ол қолда бар құралмен бәрін түсіндіріп, дәнекерлеумен қалай дұрыс жұмыс істеу керегін үйретті. Мен бұған дейін көп нәрсені білмедім, курстың арқасында құнды тәжірибе алдым және алған дағдымды жұмыста қолданамын. Курсты аяқтағаннан кейін мен Joltap жобасы туралы таныстарыма айттым. Мұнда базалық білім алумен қатар оны тәжірибеде пайдалануға болады, – деді жас кәсіпкер.
Айбат болашақта SMM және бухгалтерия курсын да меңгеруді жоспарлап отырғанын жасырмады.
Joltap жобасы Астана қаласы әкімдігінің бастамасымен жүзеге асуда. Оған 18-50 жас аралығындағы кез келген елордалық тұрғын қатыса алады.
Гүлбаршын ӨКЕШҚЫЗЫ
