Өткен жұмада «Бүкілқазақстандық ағаш отырғызу күні» өтті, деп хабарлайды www.astana-akshamy.kz/
«Таза Қазақстан» экологиялық кампаниясы аясында және «Орман шаруашылығы қызметкерлері күні» мерекесіне орай Қазақстан Республикасының Экология және табиғи ресурстар министрлігінің қызметкерлері және ЮНИСЕФ-тің экологиялық белсенділері ағаш отырғызу акциясын өткізді.
Бұл іс-шара – Мемлекет басшысының экологиялық жағдайды жақсарту бойынша берген тапсырмаларын жүзеге асырудағы маңызды қадам.
ТРЦ «Хан Шатыр» аумағында 100 ағаш (дуб, терек, клен) отырғызылса, Ботаникалық бақта 500 ағаш (алма, шие, ирга, жимолость, тал) отырғызылды. Акцияға 300-ге жуық қатысушы жиналып, ынтамен қатысты.
“Біздің Астанамызды жасылдандыруға үлес қосқан барша қатысушыларға алғысымызды білдіреміз! Бірге біз экологияны жақсарту және әдемі қала ортасын қалыптастыру үшін маңызды қадам жасадық”, – дейді акцияға қатысушылар.
Экология және табиғи ресурстар министрлігі Баспасөз қызметінің мәліметінше, «Таза Қазақстан» бағдарламасын өткізудің барлық кезеңінде, яки 2024 жылдың наурыз-қыркүйек айлары аралығында республика бойынша 140-тан астам іс-шара өткізіліп, оған 4,1 млн-нан астам адам қатысқан. Әлеуметтік нысандардың 34,8 мыңнан астам аумағын тазарту, қоғамдық кеңістіктің 5 мыңға жуық объектілерін (саябақтар, скверлер) абаттандыру бойынша жұмыстар жүргізілген. 800-ден астам субұрқақ тазартылып, жөнделді. 2,9 мың ағаш және бұта көшеттері отырғызылған. 1,2 млн. тоннадан астам қоқыс жиналған, 50 мыңнан астам арнайы техника жұмылдырылған.
Іс-шаралар апта сайын келесідей атаулармен өткізілді: “Таза өлке”, “Киелі мекен”, “Жасыл аймақ”, “Өнегелі ұрпақ”, “Мөлдір бұлақ”, “Таза орман” және т.б.
“Сонымен қатар, аумақтық экология департаменттері полиция департаментімен бірлесіп, еліміздің барлық өңірлерінде “таза ауа” рейдін өткізді. Рейдтің мақсаты экологиялық стандарттарға сәйкес келмейтін көліктерді анықтау болды. Рейд барысында 482 автокөлік тексерілді, 105 бұзушылық анықталды, жалпы сомасы 221 мың теңгеден астам айыппұл немесе ескерту түрінде 96 жүргізуші жауапқа тартылды.
Сондай-ақ, бағдарлама аясында аумақтық экология департаменттері жергілікті атқарушы органдармен бірлесіп, рұқсат етілмеген қоқыстарды жою бойынша баспасөз турын өткізді. Мәселен, 2024 жылы “Ғарыш сапары” ғарыш мониторингі аясында 2612 қоқыс орны анықталды, оның 1175-і немесе 45%-ы жойылды.
Мемлекеттік экологиялық инспекторлар әкімшілік құқық бұзушылық туралы Кодекске сәйкес жалпы сомасы 5,2 млн.теңгеге 93 лауазымды адамды жауапқа тартты”, – делінген хабарламада.
2024 жылғы 5 шілдеден бастап @TazaQazBot жеделхат-чат-ботының жұмыс істеген сәттен 2745 өтінім келіп түсті, 1538-і орындалды, 803-і орындалу барысында, 365 өтінім жойылды және 12-сі қайтарылды. Өтініштердің негізгі тақырыптарына мыналар жатады: жолдарды абаттандыру, қоқыстарды тазарту, қоғамдық аумақтарды жарықтандыру, аула алаңдары, қоқыстарды шығару, саябақтар мен аллеяларды тазарту және басқалар. Өтінімдердің көпшілігі Алматы (1019), Астана (618) қалаларынан және Түркістан облысынан (238) келіп түседі. Ең аз саны Маңғыстау облысында (23), Ұлытау облысында (18) және Жетісуда (15).
