22 қазанда Астана қаласының орталық алаңында Республика күніне орай Төтенше жағдайлар департаментіне 15 бірлік жаңа өрт техникасына сертификат табысталды, деп хабарлайды astana-akshamy.kz
Іс-шараға Төтенше жағдайлар министрі генерал-майор Шыңғыс Әрінов, қала әкімі Жеңіс Қасымбек, сондай-ақ елордалық ТЖД басшылығы қатысты.
Ведомство басшысы өзінің құттықтау сөзінде Қазақстан Президентінің қолдауымен бүгінде азаматтық қорғау органдарының материалдық-техникалық жабдықталуы, сондай-ақ ТЖМ бөлімшелерінің қызмет ету шарттары жақсарып келе жатқанын атап өтті.
«Соңғы айларда министрлік ауқымды реформаларды жүзеге асырды. Бірегей өрт сөндіру кешені ашылды, заманауи әмбебап жауынгерлік киім сатып алынды, ведомство бөлімшелерінің материалдық-техникалық жабдықталуы жақсарды. Өрт сөндірушілер мен құтқарушылардың әлеуметтік және тұрғын үй мәселелері кезең-кезеңімен шешілуде. Тек Астанада жыл басынан бастап 50 құтқарушының отбасы жаңа қонысқа ие болды», – деп ТЖ министрі атап өтті.
Өз кезегінде елорда әкімі Жеңіс Қасымбек әкімдік елордалық гарнизон қызметкерлерінің жағдайларын жақсарту бойынша жұмысты жалғастыратынын айтты.
«Соңғы үш жылда ТЖД автопаркі 90 арнайы техникамен толықтырылды. Бұл жаңа өрт сөндіру машиналары тұрғындардың өмірі мен мүлкін сақтауға көмектесетініне сенімдімін», – деді Астана қаласының әкімі.
Айта кетейік, бұл жолы елордалық гарнизонның гаражы «Hyundai Pavise» базасында жасалған өрт сөндіру автоцистерналарының 15 бірлігімен толықтырылды. Бұл техника төтенше жағдайларға жедел әрекет етуге, авариялық-құтқару жұмыстарының тиімділігін арттыруға, сондай-ақ жеке құрамды, өрт сөндіру құралдарын және техникалық қару-жарақты ТЖ орнына жеткізуге арналған.
Бүгінгі таңда ТЖД-да 202 бірлік техникасы бар. Жыл басынан бастап департамент қызметкерлері ТЖ орнына 4 мыңнан астам рет шықты. 200-ден астам адам құтқарылып, 300-ден астам адам эвакуацияланды.
