Amanat партиясының «Ұлы дала» байқауы аясында аталмыш партияның Астана қалалық филиалы ұйымдастырған жас қаламгерлер байқауының жеңімпаздары анықталды. Марапаттау рәсіміне аталған партияның елордалық филиалының атқарушы хатшысы Мұхаммед Болысбек, қалалық мәслихат депутаттары, белгілі қаламгерлер, зиялы қауым өкілдері қатысты.
Байқау 20-45 жас аралығындағы авторлар арасында «Поэзия», «Проза», «Балаларға арналған шығарма» аталымдары бойынша ұйымдастырылды. Оған барлығы 47 туынды келіп түсті. Көрнекті ақын, Абай атындағы Мемлекеттік сыйлықтың лауреаты Ғалым Жайлыбай, белгілі ақын, сыншы Сұраған Рахметұлы бастаған қазылар алқасы солардың арасынан жеңімпаздарды анықтады.
«Поэзия» аталымында 3-орынды Алтынбек Мерсадық, 2-орынды Қабиден Қуанышбай, 1-орынды Наурызбек Сарша иеленді. «Проза» аталымында 3-орын Ілияс Қыдырбаевқа, 2-орын Есбол Нұрахметке, 1-орын Бақытбек Қадырға бұйырды. «Балаларға арналған шығарма» аталымындағы жүлделер былайша бөлінді: 3-орын – Нұрбек Кеңесбай, 2-орын – Диана Қалдалы, 1-орын – Айдана Қайсарбекқызы.
Сонымен қатар арнайы жүлделер тағайындалып, тапсырылды. Кәкімбек Салықов атындағы арнайы жүлде – Қарлығаш Қабай, Ақселеу Сейдімбек атындағы арнайы жүлде – Арманбек Жәкейхан, Несіпбек Айтұлы атындағы арнайы жүлде – Біржан Ахмер, Ғабиден Құлахмет атындағы арнайы жүлде – Мырзатхан Танзираұлы.
Аманғали ҚАЛЖАНОВ
