Есірткі қолдану – адам денсаулығына үлкен қиындықтар әкеледі. Астана қаласының психикалық денсаулық орталығында есірткінің қиындықтары туралы талқыланды, деп хабарлайды astana-akshamy.kz.
Есірткі қолданудың медициналық тұсы әртүрлі физикалық және психикалық салдарды қамтиды. Физикалық салдары ағзаның түрлі мүшелерінің зақымдануымен, жүрек-қантамыр жүйесінің бұзылуымен, тыныс алу жүйесі мен ас қорыту жүйесінде мәселелер туындаумен, сондай-ақ түрлі инфекциялық аурулармен көрінуі мүмкін. Есірткі қолдану иммундық жүйенің бұзылуына, жалпы денсаулықтың нашарлауына және иммунитеттің әлсіреуіне әкеліп соғады.
2024 жылдың 9 айында «Қалалық психикалық денсаулық орталығында» есірткіге тәуелділік бойынша есепте тұрған адамдар саны 1,5%-ға азайған. 2024 жылдың 1 қазанындағы мәлімет бойынша есепте тұрғандар саны – 976, оның ішінде 3 жасөспірім бар, бұл 2023 жылмен салыстырғанда 14 адамға аз.
Сонымен қатар, есірткіге тәуелділік бойынша алғаш рет есепке алынған адамдардың саны 41,3%-ға төмендеген. Биыл 51 адам есепке алынған, оның ішінде 27 адам – синтетикалық есірткі тұтынушылар. Барлығы 262 есірткіге тәуелді адам ерікті түрде тәулік бойы емдеу стационарында емделген.
Есірткі қолданудың психикалық салдары да аз емес. Есірткінің әсері депрессия, мазасыздық, психоздар, оқуға және есте сақтауға қабілеттіліктің төмендеуі, сондай-ақ тәуелділіктің дамуына әкелуі мүмкін. Ұзақ уақыт бойы есірткі қолдану мидағы химиялық теңгерімді өзгертуі мүмкін, бұл ауыр психикалық бұзылуларға және тіпті өзін-өзі өлтіру туралы ойларға әкелуі мүмкін.
«Қалалық психикалық денсаулық орталығы» Астана қаласында есірткі қолданудың қауіптері туралы ескерту жұмыстарын жүргізіп, есірткі қолданудың салдарымен бетпе-бет келген адамдарға көмек көрсетеді, сондай-ақ тәуелділікпен күресуге және зардап шеккендердің психикалық денсаулығын қалпына келтіруге көмектеседі. Халықтың есірткі тәуелділігінің медициналық салдары туралы хабардар болуы және мамандардың қолдауы есірткіге тәуелділік мәселесін шешуде маңызды рөл атқарады.
