Астанада ақшаны жылыстатуға қарсы жүйе мамандарына арналған Стратегиялық талдау бойынша оқыту семинары өтуде, деп хабарлайды www.astana-akshamy.kz/
Іс-шараны “Эгмонт” тобының (ECOFEL) қаржылық барлау бөлімшелерінің (ҚББ) озық тәжірибе және көшбасшылық орталығы ұйымдастырды.
Үш күндік семинар барысында ECOFEL шақырылған сарапшылар стратегиялық талдау жүргізу тәжірибесімен бөліседі, оның мақсаты – кірістерді жылыстату және терроризмді қаржыландыруға қарсы күрес саласындағы жаңа трендтерді, заңдылықтар мен үрдістерді анықтау.
Оқыту процесі тек теориялық білім алуды ғана емес, сонымен бірге алған дағдыларын бекітуге мүмкіндік беретін практикалық мәселелерді шешуді де қарастырады.
Астанаға келген шетелдік мамандар кірістерді жылыстатуға және терроризмді қаржыландыруға қарсы іс-қимыл саласындағы халықаралық ұйымдар ұсынған ережелер мен нормалардың белгіленген жүйесін сақтаудың маңыздылығын атап өтуде, бұл өз кезегінде халықтың қауіпсіздігін қамтамасыз етеді.
Іс-шара Қазақстан мен Өзбекстан ҚББ өкілдері үшін өзара бағалау қорытындылары бойынша екі елге техникалық көмек көрсету жөніндегі жобалық жоспарлар шеңберінде өткізілуде.
Қаржылық мониторингі агенттігі ақшаны жылыстатуға қарсы ұлттық жүйенің әлеуетін, оның ішінде сала мамандарының біліктілігін ұдайы арттыруды белсенді жалғастыратын болады.
Анықтама: “Эгмонт” тобы-177 ел мен мемлекеттік құрылымдар кіретін әлем елдерінің қаржылық барлау бөлімшелерінің (ҚББ) бейресми бірлестігі.
Ұйымның мақсаты: ақшаны жылыстатуға және терроризмді қаржыландыруға қарсы күрес мақсатында, сондай-ақ АЖ/ТҚҚ бойынша ішкі бағдарламаларды іске асыруға жәрдемдесу мақсатында бүкіл әлемде ҚББ-ның тиімді өзара іс-қимылы үшін алаңды қамтамасыз ету.
