Елбасы Ташкентте Абай ескерткішінің ашылу салтанатына қатысады. Бұл туралы ҚР Президенті жанындағы Орталық коммуникациялар қызметінің ресми өкілі Алтай Әбибуллаев мәлімдеді.
Мемлекет басшысының баспасөз қызметіне сілтеме жасаған А.Әбибуллаевтың айтуынша, 13-14 маусымда Қазақстан Президенті Н.Назарбаев Өзбекстанға ресми сапармен барады. Сапар аясында экономикалық, мәдени, гуманитарлық қарым-қатынастардың бүгіні мен ертеңі кеңінен талқыланады. Сондай-ақ, аймақтағы қауіпсіздік мәселелерін де талқылау көзделген. Ташкенттегі келіссөздердің қорытындысы бойынша Қазақстан мен Өзбекстан арасындағы бірқатар үкіметаралық екіжақты келісімдерге қол қою қарастырылып отыр.
Бұдан бөлек, Мемлекет басшысы Н.Назарбаевтың қатысуымен Ташкентте Қазақстан Республикасының Өзбекстан Республикасындағы елшілігінің жаңа ғимараты мен Абай ескерткішін салтанатты ашу рәсімі жоспарланған.
Еркежан СӘТІМБЕК
