Елордада «Нұр Отан» партиясы төрағасының Бірінші орынбасары Бауыржан Байбектің қатысуымен партияның Астана қалалық филиалының ХІХ есептік-сайлау конференциясы өтті.
Конференцияда елорда әкімі Әділбек Жақсыбеков партияның Астана қалалық филиалының төрағасы болып сайланды.
Әділбек Жақсыбеков көрсеткен сенімдері үшін партияластарына ризашылығын білдіріп, елордадағы партиялық ұйымның төрағасы ретінде оған зор жауапкершілік жүктеліп отырғанын атап өтті.
«Партияда жаңа саяси технологиялармен жауапкершілікке ықпал етудің ақпараттық тәсілдері пысықталуы тиіс. Партияаралық пікірталас біз үшін нормаға айналуы қажет және біз ынтымақта болуға ұмтылуымыз керек» деді Әділбек Рыскелдіұлы.
Сондай-ақ, қала әкімі Мемлекет басшысының «Нұрлы Жол – болашаққа бастар жол» Жолдауындағы тапсырмаларды партиялық құрылымдар арқылы тиянақты орындауға айрықша мән беру керек екенін айтты.
Бұдан бөлек, Астана қалалық Саяси кеңесінің жаңа құрамы анықталды. Жаңа құрамға мемлекеттік қызмет, білім беру мен ғылым, мәдениет, денсаулық сақтау салаларының өкілдері, салалық экономика мен қызмет көрсету кәсіпорындарының жұмысшылары, сондай-ақ, азаматтық қоғам белсенділері мен «Жас Отан» жастар қанатының мүшелері сайланды.
Ал «Нұр Отан» партиясы төрағасының бірінші орынбасары Бауыржан Байбек: «Партия көшбасшысының жетекшілігімен тәуелсіздігімізді нығайтуға өз үлесімізді қосатынымызға сенімдімін. Бұл – біздің саяси доктринамызда айтылған басты жетістік. «Нұрлы Жол» жаңа экономикалық саясаты әлемдегі ең дамыған 30 елдің қатарына қосылуға қарқынды қадам жасауға жағдай туғызады. «Нұр Отан» партиясының мақсаты – бірлікті, келісімді, қоғамдық тұрақтылықты қамтамасыз ету» дей келіп, партияның астаналық филиалына үлкен жауапкершілік жүктеліп отырғанына ерекше тоқталды.
Сонымен қатар, конференцияда «нұротандықтар» партияның Саяси кеңесінің кеңейтілген отырысында қабылданған 2015-2025 жылдарға арналған сыбайлас жемқорлыққа қарсы іс-қимыл бағдарламасының жүзеге асырылуын талқылады.
Партияның сайлауалды тұғырнамасының орындалу нәтижесіне көз жүгіртсек, Астанадағы жұмыссыздық деңгейі жыл өткен сайын төмендеп келеді. Биылғы жылдың екінші тоқсанында бұл көрсеткіш 0,3%-ға төмендеп, 5,2%-ды құраған. Ал сәбилердің шетінеуі 21,4%-ға төмендеп, қазір 100 мың балаға 7-ден келеді. Шағын және орта бизнес субъектілерінің саны да өсу үстінде. Алдыңғы жылмен салыстырғанда, олар 4,3%-ға артып, барлығы 9 076 субъектіні құрап отыр. Бүгінгі күні 903,6 мың шаршы метр тұрғын үй пайдалануға беріліп, бұл көрсеткіш алдыңғы жылмен салыстырғанда 4,5%-ға жоғарылаған.
Нұрислам ҚҰСПАНҒАЛИ
