Халықаралық конкурстардың лауреаты скрипкашы Эдуард Давидович Грач 1961 жылы шілде айында Көкшетау, Қызылжар өңірінде бірнеше концерт беріп, шілденің бір кешін Целиноград тұрғындарына арнады. Өлкелік орыс драма театрының сахнасында Брамстың «Венгр биі», Чайковскийдің «Мелодия», Бахтың «Ария», т.б. шығармаларын шеберлікпен орындады.
Көрермендердің ыстық ықыласына бөленген Эдуард Грач, сезімтал, мейірбан көрермендермен кездескеніне алғыс білдіріп, «тыңды игерушілер музыканы сүйеді, өнерді бағалай біледі» деп өзінің ризашылығын білдірді.
Араға жылдар салып, КСРО Халық артисі, Мәскеу консерваториясының профессоры, «Monti Azzuri» (Италия) музыка академиясының академигі, дирижер, үздік ұстаз, әлемнің ең әйгілі скрипкашы-маэстроларының қатарындағы Эдуард Давидович Грач 2012, 2014 жж. ҚР Мәдениет және ақпарат министрлігі және Қазақ Ұлттық өнер университетінің ұйымдастыруымен Астана қаласында өткен IV, V халықаралық скрипкашылар байқауының, 2019 жылы «Astana-Violin» VIII халықаралық скрипкашылар байқауының қазылар алқасының мүшесі болды, конкурс аясында Э.Грач шеберлік сабақтарын өткізді.
Ғазиза Исахан
