Даңқты композитор әрі дирижер Нұрғиса Тілендиевтің 100 жылдығына орай Астанада «Әлқисса – Нұрғиса» атты мерейтойлық концерт өтті. Ғасырлар көрінісін сипаттайтын әндер мен күйлер, халық аспаптар оркестрі мен симфониялық оркестрі, сондай-ақ хор капелласының бірлескен коллаборациясы көрерменді бей-жай қалдырмады, деп хабарлайды astana-akshamy.kz
Дирижердың мерейтойына арналған концертке Қазақстанның еңбек сіңірген қайраткерлері – Светлана Айтбаева, Азамат Жылтыркөзов, Жұбаныш Жексенұлы, Нұржан Жанпейісов, халықаралық және республикалық байқаулардың лауреаттары – Феруза Рахметова, Артур Ғабдиев, Расул Жармағамбет, Нұрғалым Аманбай, Фархад Көбеев, Назерке Өмірбаева, композитордың жиен немересі – Даяна Тілендиева, Қазыбек Құрайыш, Н. Тілендиев атындағы мемлекеттік академиялық, фольклорлы-этнографиялық «Отырар сазы» оркестрі, Е.Рахмадиев атындағы мемлекеттік академиялық филармониясының симфониялық оркестрі және Б.Байқадамов атындағы Мемлекеттік хор капелласы қатысты. Композитордың 20-ға жуық күйлері мен әндерін орындаған «Отырар сазы» оркестріне оның бас дирижеры және көркемдік жетекшісі, Қазақстанның Еңбек сіңірген қайраткері Дінзухра Тілендиева Нұрғисақызы дирижерлық етті. Сонымен қатар екінші дирижер ретінде Қазақстанның Еңбек сіңірген артисі, «Құрмет» орденінің иегері, профессор Жалғасбек Бегіндіков өнер көрсетті. Оркестр концертті композитордың «Ата толғауы» күйімен бастады. Одан әрі талант иесінің қазақтың белгілі ақындарының сөзіне жазған «Жан сәулем», «Абай табиғаты», «Есіңе мені алғайсың», «Өз елім», «Қарлығаштар», «Куә бол», «Дариға, домбырамды берші маған!», «Әкеме», «Әжеме», «Жүрегім менің», «Ақ құсым», «Алатау» әндері орындалды. Соның ішінде бір М.Мақатаевтың өлеңдеріне 40-қа жуық әндер жазған.
Ғасырда бір туатын талант иесі қазақ халқының өнерін әлемдік деңгейге көтерді. Ал өзі кеткен соң оның мерейтойы ЮНЕСКО-ның 42-бас конференциясының шешімімен халықаралық мерекелік іс-шаралар тізіміне еніп, әлемдік ауқымда атап өтілуде. Бұл концерт – осы мерейтойдың ресми бастамасы, беташары болды. Бүкіл саналы ғұмырын өнерге арнаған Н. Тілендиев 500-ден астам музыкалық еңбектерін қалдырса, оның ішінде әндер мен күйлерден басқа балет, пьеса, опера, фильмдерге жазылған музыкалар мен увертюралар, элегиялар мен поэмалар, контаталар бар. Ол еліміздің Алтын қорына енген 20-дан астам кинотуындыға музыка жазған. Композитордың елге танымал «Махамбет», «Әлқисса», «Ұлы той», «Аққу» күйлері осы кеште орындалып, кеш соңы көпшіліктің бірге орындауымен «Құстар қайтып барады» әнімен аяқталды. ҚР Мәдениет және ақпарат министрлігінің қолдауымен өткен концертке Президент атынан Ықылас гүлі сахнаға әкелінді.
Райхан Рахметова
