Дүниежүзілік аутизм туралы ақпарат тарату күніне орай елорданың Өзбекәлі Жәнібеков атындағы №11 мектеп-лицейінде «Аутист балалармен жұмыс барысындағы кешенді тәсілдер» атты жиын өтті. Іс-шарада ерекше білімді қажет ететін балалармен жұмыс істеудің мән-маңызы сөз болды.
Ерекше білімді қажет ететін балалардың қоғамдағы алатын орны туралы ақпараттандыру мақсатындағы жиынға елордалық мәслихат депутаттары Кендебай Адамбеков, Мәдина Әжікенова, Асқар Смағұлов, Қазақстанның халық әртісі Майра Ілиясова, қалалық Әдістемелік орталықтың ерекше білімді қажет ететін бөлім басшысы Салтанат Қасымқанова, «Болашақ» корпоративтік қорының координаторы Самал Әлбілекова, мұғалімдер мен ата-аналар қатысты.
Жиында алғы сөз сөйлеген мәслихат депутаты Кендебай Адамбеков Астана қаласының әкімдігі мен мәслихаты, әсіресе Білім басқармасымен бірлесіп, аутизмге шалдыққан балаларға жағдай жасау мақсатында кешенді іс-шаралар жүргізіліп жатқанын атап өтті.
– Қазіргі таңда бас қалада психологиялық-медициналық-педагоги-калық консультацияның статистикасына сәйкес есепте 18 жасқа дейін аутизм спектрі бар бала саны 3609-ға жетіп отыр. Бала саны артып келеді, сондықтан білім беру ұйымдарында бейімделген бағдарлама құру бойынша үнемі әдістемелік қолдау көрсетіліп тұрады. Инклюзивті қолдау кабинеттерінің санын арттыру да – басым бағыттардың бірі. Бүгінде қалада 64 инклюзивті қолдау кабинеттері бар. 2024-2025 оқу жылының басында 25 мектепте осындай кабинеттер ашылды. Сонымен қатар, 4 психологиялық-педагогикалық түзету кабинеті, 2 оңалту орталығы және «Асыл Мирас» аутизмі бар балаларды қолдау орталығы жұмыс істейді.
2023-2024 оқу жылынан бастап ерекше білім беру қажеттілігі бар оқушыларды кәсіптік бағдарлау мақсатында «Менің болашақ мамандығым» атты эксперименттік жоба жүзеге асырылуда. Жоба қаланың әр ауданы бойынша 8 мектепте үйірме түрінде жүргізіліп, 69 баланы қамтыды. Қазірде оң нәтижесін көрсетіп жатқаны қуантады. Бағдарламада балалар «Тігін ісі», «Аспаз ісі» мамандықтары бойынша алғашқы кәсіптік дағдыларды үйренеді. Жалпы бір жылдың ішінде 10 мыңға жуық балаға психологиялық-педагогикалық түзету көмек көрсетіледі, – деді К.Сарыбайұлы.
Ө.Жәнібеков атындағы №11 мектеп-лицейінде арнайы инклюзияны қолдау кабинеті 2020 жылы Болашақ корпаративтік қорының қолдауымен ашылған. Кабинет ерекше білімді қажет ететін оқушыларға арналған арнайы үстел, орындық, демалыс орны және өзге де құрал-жабдықтармен қамтамасыз етілген.
Астаналық Әдістемелік орталықтың ерекше білімді қажет ететін бөлім басшысы Салтанат Қасымқанованың сөзінше, жылдан-жылға аутизм спектрінің бұзылуы бар балалар саны артып келеді. Былтырғы оқу жылында 11 оқушы болса, бүгінде 27 ерекше білімді қажет ететін оқушы 2-ауысымда білім алады.
– Аутист балалар басқа да білім алушылармен бірдей мектепте оқуға құқылы. Алайда олар мектепке келгенде бірден сабаққа толық қатысып кете алмайды. Оларға арнайы педагог-ассистент маманның көмегі керек. Аталған лауазым аутист баланың ақыл-ой қабілетіне, даму ерекшелігіне қарай мұғалімнің мектеп бағдарламасы бойынша өткен тақырыптарын баланың игеріп кетуіне көмектеседі. Дегенмен мамандардың мәртебесін арттыру мәселесі өзекті. Педагог-ассистенттерге де өзге пән мұғалімдеріндей көңіл бөлінуі қажет, – деді «Болашақ» корпоративтік қорының координаторы Самал Әлбілекова.
Конференция барысында педагог-ассистент мамандар аутизм спектрінің бұзылуы бар оқушылармен жұмыс істеудегі педагогикалық іс-тәжірибелерімен бөлісіп, ерекше тәсілдер талқыланды. Жиында ата-аналар да сөз сөйлеп, дарынды оқушылар өз өнерлерін ортаға салды.
Индира Бержанова
