Премьер-министр Серік Ахметовтің төрағалық етуімен селекторлық режимде өткен отырыста еліміздің агроөнеркәсіптік кешенін одан әрі дамыту мәселелері талқыланды.
Үкімет басшысы «Агробизнес-2020» АӨК дамыту бағдарламасын жүзеге асыру жөніндегі жұмыстар бекітілген жоспарлар шеңберінде жүргізіліп жатқанын атап өтті. Ол 2013 жылдың қолданыстағы заңнамаға тиісті өзгерістер енгізілгеннен кейін, 2014 жылдан бастап қолданысқа енетін займдарды кепілдендіру мен сақтандыру, инвестициялық субсидиялау, сатып алу бағасын кепілдендіру сияқты жаңа мемлекеттік қолдау механизмдерін іске қосу мен ұйымдастыру жылы екенін айтып өтті.
Саланың бүгінгі жағдайы мен жаңа «Агробизнес-2020» салалық бағдарламасының орындалу барысы және оны жүзеге асырудың тетіктері туралы Ауыл шаруашылығы министрі Асылжан Мамытбеков баяндады. Атап айтқанда, «АӨК-ті мемлекеттік қолдау көлемін 4,5 есеге арттыру қарастырылады, саланы дамыту жобасын жүзеге асыру кезеңінде 10 трлн теңгеден кем емес жеке қаржы тартылады» деді ол.
Еркежан СӘТІМБЕК
