ӘЙЕЛДЕРДІ ӘСПЕТТЕЙТІН АЛЬМАНАХ
Жақында Астана қаласы әкімдігінің қолдауымен «Жаңа заман: табыс кілті» баспа жобасының шеңберінде, қазақ және орыс тілдерінде «Астана: әйел келбеті» иллюстрацияланған таныстырылымдық альманағы жарық көреді. Осыған байланысты кітапты баспаға дайындап жатқан топтың жетекшісі Элита Владимировна Осокинаны әңгімеге тартқан едік.
– Альманахты шығарудағы мақсатты айтып өтсеңіз.
– Биыл Астананың 15 жылдық мерейтойы екенін білесіздер. Альманах осынау мерейлі датаға арналып отыр. Онда саясат пен бизнесте, ғылым мен спортта, өнерде, оқу-ағарту саласында және медицинада жүрген әйелдердің өмірі мен еңбегі жайлы баяндалады. Қазіргі таңда нәзік жандылар қай істе болсын белсенділікпен көрінуде. Біздің мақсатымыз – Астанадағы еңбекте үлкен жетістіктерге жетіп, асқақ армандарын жүзеге асырған әйелдерді ел назарына шығару.
– Альманах тарау, бөлімдерге бөлінген бе?
– Бөлінген. Атап айтсақ, альманахта «Елорда әйелдері: ХХІ ғасыр», «Даңқ галереясы», «Жансерігім, жолдасым, жұлдызым», «Заман әйелдері» тараулары бар. Бұл тарауларда әйелдердің басқару, экономикалық және әлеуметтік саланы дамыту, Қазақстанның келешегі – өскелең ұрпақ тәрбиесі істеріне қосып жатқан үлесі жөнінде айтылады. Сонымен бірге, Отан мен қала тарихының беттерінде өз атын қалдырған даңқты әйелдердің тағдыры туралы сыр шертіледі.
Астанада өмір сүріп, қызмет етіп жүрген, өмірде үлкен жетістіктерге қол жеткізіп, өзінің саласында беделге ие болған тамаша замандастарымыз жөнінде айтылатын «Заман әйелдері» тарауы кітаптың ең көлемді бөлігін құрайды. Оған «Үкімет адамдары», «Елорда мақтанышы», «Табысты әйел», «Әйел – ана» бөлімдерін енгіздік.
Сондай-ақ, нәзік әйел жанымен ауыр жүк көтеріп, қашанда еріне, балаларына тірек бола білген әйел-ана, әйел-жар, әйел-серік, әйел-муза туралы сөз болады.
– Кітапқа қанша әйелдің енгізілгені туралы және таралымы жайлы, оның нақты жарыққа шығатын уақытымен хабардар етсеңіз.
– Таралымы 1000 дана болатын кітапқа жүз шақты әйел енгізілген. Ол оқырманның қолына алдағы күз айларының бірінде тимек.
Еркежан СӘТІМБЕК