Бас қалада «Назар аударыңыз! Балалар!» жедел-алдын алу іс-шарасы басталды.
Ол осы айдың 30-ына дейін жалғасады. Акция аясында ұйымдастырылған шаралар туралы Астана қаласы ІІД әкімшілік полиция басқармасы бастығының орынбасары Ғосман Жақин әңгімелейді.
– Аталмыш акция аясында қандай шаралар ұйымдастырылады?
– «Назар аударыңыз! Балалар!» жедел-алдын алу іс-шарасы аясында Астана қаласындағы Ішкі істер департаменті әкімшілік полиция басқармасының қызметкерлері білім беру мекемелеріндегі жас жол қозғалыс инспекторларымен бірлесіп мектеп оқушыларына кәмелетке толмаған балалардың қатысуымен болатын жол-көлік оқиғаларының алдын алу, олардың өмірі мен денсаулығын сақтау, қала жолдарындағы жағдайды тұрақтандыру бойынша кең ауқымды түсіндіру жұмыстарын жүргізеді. Жол ережелерін бұзған балалардың ата-аналары әкімшілік жауапкершілікке тартылады.
Астанада 72 мектеп болса, барлық білім беру мекемелерінде соншалықты жас жол қозғалыс инспекторлары бар. Балалар жарақаттанушылығын алдын алу мақсатында олардың қатысуымен слеттер ұйымдастырылып тұрады. Маусым айында балалар Өскеменде өтетін осындай шараға қатысып қайтуды жоспарлап отыр.
Осы акция аясында біз Астанадағы №2 қалалық балалар ауруханасында болып, ондағы жол апатынан зардап шеккен балаларға жарқылдауық білезіктер сыйға тарттық. Жарқылдауық элементтері бар киімдерді киіп, заттарды қолданған жаяу жүргіншіні жүргізуші тәуліктің қараңғы мезгілінде де жолда жылдам байқай алады. Олар 300-400 метрден көрінеді.
– Қазіргі таңда жол апаты салдарынан зардап шеккен балалар саны қанша?
– Бүгінде Астанадағы №2 қалалық балалар ауруханасының травматологиялық пунктіне түскен балалардың саны 100-ден 150-ге дейін көбейген. Қазіргі уақытта жол апаты салдарынан зардап шеккен 27 бала осы емдеу мекемесінде ем қабылдауда.
Жалпы, жақында тіркелген 28 жол-көлік оқиғасының салдарынан бір бала қайтыс болса, 27 бала түрлі жарақат алған. Олардың басым бөлігі, нақтырақ айтсақ, 23-і жолды белгіленбеген жерлерден өткен. Сондай-ақ, кейбір ата-аналар кәмелетке толмаған балаларды көлікте ұстап отыратын құрылғыларсыз тасымалдайды. Осындай жол апатының бірінде автокреслосыз тасымалданған 10 жасар қыз оқиға болған жерде қайтыс болды. Акция аясында ұйымдастырылатын шаралар барысында мұндай оқиғалардың алдын алу үшін қауіпсіздік ережелерінің қатаң сақталуын ескертеміз.
– Акция қаншалықты жиі өткізіліп тұрады?
– Жыл сайын екі рет: кезекті оқу жылының аяқталар алдында және жаңа оқу жылы қарсаңында өткіземіз. Мұндағы басты мақсат – кәмелетке толмағандардың қатысуымен болатын жол-көлік оқиғаларының алдын алу, көшелер мен жолдарда қауіпсіз мінез-құлық машықтарын бекіту.
Биыл мамырдың 20-сы күні басталған акция осы айдың 30-ына дейін жалғасады. Акция аяқталғанға дейін елордадағы әрбір оқушыға 4 ай мерзімге жарамды сақтандыру полисін сыйға тартпақшымыз.
Гүлбаршын ӨКЕШҚЫЗЫ
