ӘКІМ КУБОГЫ ӘНЕЛДЕ
Мереке күндері Астана қаласы әкімінің кубогы сарапқа салынған «Бәрі де ән шырқайды» атты караоке чемпионатының ақтық сыны өтті.
«Бәрі де ән шырқайды» конкурсы елорда күніне орай осымен екінші рет ұйымдастырылды. Жобаның идеясы да кездейсоқ туған көрінеді. Байқаудың қоюшы режиссері Бақытжан Тажинов: «Шығармашылық орта болған соң, достармен караокеге жиі барамыз. Неше түрлі дауыстарды естиміз. Жанды дауыста әнді шын жүрегімен әдемі жеткізе білетіндер көп кездеседі. Осы дарындардың басын біріктіріп, үлкен сахнаға шығарсақ деп ойладым» дейді. Мұндай ұсынысты қала әкімдігі бірауыздан қолдаған. Былтыр чемпионат өнерсүйер қауым арасында жылы қабылданып, осы жылы қатысуға ниет білдірушілер қатары едәуір көбейіпті.
Байқау шарты бойынша чемпионатқа 16-75 жас аралығындағы өнерпаздар қатыса алады. Басқа байқаулардан ерекшелігі, бұл жерде кәсіби, әуесқой әншілерді бөлек бағалайды. «Алау», «Сазды жүрек» және «ЖасStar» тобы құрылған. Соңғысы музыкалық білімі бар 30-ға дейінгі әншілерді қамтиды. Бір қызығы, жүлдеден үміттілердің ең үлкені – 65 жастағы әже болып шықты.
15 мамырда өткен кастингке 250-ге жуық үміткер қатысып, 60 адам іріктелген болатын. Екінші кезеңде 15 әнші байқаумен қош айтысты. Қалғаны бірнеше апта ұстаздардан вокал бойынша сабақ алып, сахна шеберлігін үйренді.
Ширек финалда өнерпаздар дуэт құрып, балаларға арналған әндерді шырқады. Ал, ақтық сында жеке дауыста өнерлерін көрсетті. Олардың қабілетін білікті мамандардан құралған қазылар алқасы бағалады. Нәтижесінде бас жүлде 17 жастағы астаналық бойжеткен Әнел Смайыловаға бұйырды.
Мәдина ЖАҚЫП