«Астана Таңдауы – 2014» байқауына қатысушылардан өтініштер қабылдау аяқталды. Сәуір айынан бастап 31 мамырға дейін жеті аталым бойынша өтініштер қабылданды.
Ал 1 маусымнан бастап Астана қаласы әкімдігінің сайтында педагогтар, дәрігерлер, жол салушылар, энергетиктер, жолаушылар көлігінің жүргізушісі, учаскелік инспектор мен құрылысшылар арасында үздіктерді анықтау бойынша ашық дауыс беру басталып кетті. Объективті дауыс беруді қамтамасыз ету үшін әрбір елорда тұрғыны Астана қаласы әкімдігінің сайтында бір электронды мекенжайдан бір ғана дауыс бере алады. Осылайша, дауыс берудің нәтижесінде мамандықтар бойынша нағыз көшбасшылар анықталады.
Қазіргі уақытта ұйымдастырушы комитетке 250 өтініш келіп түскен. Әр аталым бойынша үздіктер 1-20 маусым аралығында Астана әкімдігінің www.astana.gov.kz сайтында таңдалады.
«Астана Таңдауы» байқауының жеңімпаздары халықтың танымына ие болады. Ал үздік болған мамандарға Астана қаласының әкімі кубок табыс етеді. Сонымен қатар, жеңімпаздарға басқа да көптеген тосын сыйлар ұсынылады.
