Астана төріне төрткүл дүниенің шахматтан таласы бар кіл мықтыларын жинаған әйелдер арасындағы командалық IV Әлем чемпионаты басталды.
Байрақты бәсекеде Қытай, Ресей, Украина, АҚШ, Үндістан, Франция, Түркия, Грузия, Румыния және Қазақстанның шахматтан әйелдер командасы бақ сынайды. Дүбірлі доданың алдында шахматшылар мен ұйымдастырушылар журналистер қауымымен кездесіп, «Думан» қонақүйінде пресс-конференция өткізді. Жиынға Халықаралық шахмат федерациясының президенті Кирсан Илюмжинов, ҚР Шахмат федерациясының президенті Әсет Исекешев, жарыстың бас демеушісі «Самұрық-Қазына» Ұлттық әл-ауқат қорының атқарушы директоры Дархан Қалетаев сынды бірқатар өкілдермен қоса Қытай командасының топ басшысы Ю.Веньюн, Украина командасының үздік ойыншысы Анна Ушенина және Қазақстан құрамасының лидері Гүлісхан Нахбаева қатысты.
Жиын барысында Халықаралық шахмат федерациясының президенті қазақ шахматшыларының мәртебесі жыл сайын әлемдік аренада өсіп келе жатқандығын алға тартып, Ұлттық федерация 2018 жылы Астана қаласында шахматтан дүниежүзілік Олимпиада өткізуге ұсыныс білдіріп отырғандығын және оны өткізуге Қазақстанның мүмкіндігі жоғары екендігін тілге тиек етті.
Біздің команданың топ басшысы халықаралық гроссмейстер дәрежесіне ие Гүлісхан өз сөзінде: «Өте мықты Ресей, Қытай, Франция, Түркия, АҚШ командалары келді. Рейтинг бойынша 9-шы орында тұрмыз. Командалық жарыс болғандықтан, бірге дайындалып, бірге жұмыс істеп жатырмыз. Жеңіске жетуге тырысамыз», – деді.
Расында, бұл сайыс өте тартысты өтеді деп күтілуде. Себебі, әйелдер арасындағы шахматтан мықты деген әлемдік бестіктің төрт мүшесі қатысып отыр. Олар: Қытай, Ресей, Грузия, Украина. Ал, бесіншісі – Венгрия. Бірақ, олар жарысқа қатысушылар тізімінде жоқ бұл жолы. Оның үстіне, әлемдік деңгейдегі мықты ойыншылар да осында. Мәселен, жоғарыда айтқан Анна Ушенина, әлемнің экс-чемпионы Александра Костенюк (Россия) және ең мықты гроссмейстерлер: Нана Дзагнидзе (Грузия), Анна Затонских (АҚШ), Ю.Веньюндер (Қытай) – талай қарсыласын қапы қалдырған мықтылар.
Баспасөз мәжілісінен кейін әлемдік доданың салтанатты ашылуы болып өтті.
Чемпионат наурыз айының 12-сіне дейін жалғасады. Жарыс барысын www.worldcherss.kz сайтынан қадағалап отыру мүмкіндігі бар.
Ербол ЖАНАТ
