Мемлекет басшысы Заң мен Тәртіп қағидатын жүзеге асыру маңыздылығын бірнеше рет атап өтті. Бұл қағида – әділетті Қазақстанның негізгі тірегі. Осы ретте халықтың сенімінен шығу – ішкі істер органдарының басты мақсаты. Бұл мақсатқа жету үшін тұрғындармен кездесу өтіп, қоғамды алаңдатқан өзекті мәселелер талқыланады.
Өткен жыл полиция қызметкерлерінің кәсіби деңгейін арттыруға және олардың жұмыс тиімділігін көтеруге көп күш жұмсалды. Маңызды шаралардың бірі – орта буын басшыларын кезектен тыс аттестациядан өткізу болды. Астана қалалық полиция департаментінің бастығы Марат Тулебаевтың айтуынша, азаматтардың қауіпсіздігін қамтамасыз етуге бағытталған заң бастамаларын күшейту, заманауи цифрлық шешімдерді белсенді қолдану, сонымен қатар кадр әлеуетін арттыру қылмыстың алдын алуда маңызды рөл атқарды.
– Былтыр қабылданған шаралардың арқасында елордада адам өлтіру, денсаулыққа ауыр залал келтіру, ұрлау, тонау және тағы басқа қылмыстар азайды. Қоғамдық орындар мен көшелерде жасалатын қылмыстар саны кеміді. Адам өлтіру, зорлау, денеге ауыр жарақат салу, ұру, бұзақылық, автокөлік ұрлау фактілерінің бәрі ашылды. Бұл оң үрдіс әлі де жалғасуда. Биыл жыл басынан бергі 2 айда қылмыстың тіркелуі 10 пайыз төмендеді, – дейді департамент бастығы.
2025 жылды Ішкі істер министрі «Профилактика жылы: заң мен тәртіп күзетіндегі полиция» жылы деп атап, қоғам өкілдерін тарта отырып профилактикалық жұмыстарды күшейтуді тапсырды. Қоғамдық тәртіпті сақтау елордада азаматтар қауіпсіздігі үшін жағдай жасаудағы негізгі фактор саналады. «Полиция қадамдық қолжетімділікте» қағидаты аясында қоғамдық орындарда полицейлердің үнемі жүруіне мән берілуде. Өткен жылы 6 учаскелік полиция қосыны, 3 стационарлық модульдік қосын іске қосылды. Ал биыл жыл соңына дейін тағы 13 УПҚ мен 3 СМҚ-ны пайдалануға беру көзделіп отыр.
– Цифрлық жобалар жүзеге асырылып, соның арқасында полиция қызметінің бірқатар бағыттарының тиімді қызметі артты. Елордада 200 мыңнан астам бейне камера жұмыс істеп тұр, солардың көмегімен 3 мыңнан астам қылмыс ашылып, 27 мың әкімшілік құқықбұзушылық анықталды. Сонымен қатар «Визирь» аппараттық-бағдарламалық кешенінің бейне сарапшыларының жүйесінің көмегімен 563 адам анықталып, соның ішінде 327 күдікті мен құқық бұзушы мәлім болды, – дейді М.Тулебаев.
Ақпараттық-түсіндіру жұмыстарының арқасында интернет-алаяқтық деңгейі де төмендеген. Осы ретте 161 адам мен 3 топ ұсталып, 1350 интернет-ресурс бұғаттауға жіберілді, 1116 сайттың жұмысы тоқтатылды. Есірткі бойынша 1116 заң бұзушылық тіркеліп, 342 кг есірткі тәркіленді. 238 есірткі сайты жабылды. 1,5 млн-нан астам әкімшілік құқықбұзушылық анықталды. Абаттандыру ережелерін бұзған 22 мың заң бұзушы жауапқа тартылды, соның ішінде 207 құрылыс компаниясы, 217 мердігер ұйым, 100 қызмет көрсетуші ұйым, 260 шағын және орта бизнес нысандары бар. Былтыр елдің тыныштығын бұзғандар бойынша 20,5 мың факт тіркелді. Алайда тұрмыстық зорлық-зомбылық мәселесі өткір, бұл фактілер 2023 жылға қарағанда 3 есе артты.
Осы ретте 7 мың ұсақ бұзақылықпен әкімшілік жауапкершілікке тартылды.
