«ӘЛЕМ» БАЛЕТІНДЕ ҒАСЫРЛАР ӘНІ БАР
Тұңғыш рет! 27 маусым күні сағат 19:00-де! Бейбітшілік және келісім сарайының сахнасында! «Astana Ballet» хореографиялық ұжымының «Әлем» атты бір актілі балетінің тұсаукесері өтеді. Астана күнін мерекелеу қарсаңында қойылатын балеттің қоюшы хореографы – Ресейдің белгілі балетмейстері Никита Дмитриевский.
Халықтық және заманауи хореографияның классикалық дәстүрлері мен ең соңғы үрдістерін шебер біріктіре білген «Astana Ballet» хореографиялық ұжымы 2012 жылдың күз айларында құрылды. Театр Елбасы Нұрсұлтан Назарбаевтың ұсынысымен ашылды. Атқарушы директор Валерий Күзембаевтың айтуынша, бүгінде ұжым өзінің қайталанбас сипатта дамуына мүмкіндік ашу үшін өз қолтаңбасын іздеуде. «Бір жылдан аса тынымсыз еңбегіміз, Қазақстан мен шетелдегі көрермен алдындағы өнеріміз ұжымның біртұтас, бір актілі балетті сахналауға дайын екенін көрсетті. Біздің идеяларымызды жүзеге асырып, бидегі өз мәнерін енгізе алатын хореографты іздеу ұзаққа созылды. Көркемдік басшылықтың таңдауы, біздің пайымдауымызша, қазіргі заманғы ең тартымды балетмейстерлердің бірі, мәскеулік хореограф Никита Дмитриевскийге түсті. Бізге даму, жаңа ағымдар мен бағыттарды байқап көру, көрерменге ұғынықты, қазақ халқының өзіндік ерекшелігін айқындайтын заманауи би тілімен тілдесу маңызды» деп түсіндіреді жаңа қойылымның негізгі мақсатын В.Күзембаев.
Қойылымға дайындық қызу қарқынмен жүруде, Н.Дмитриевский «Astana Ballet» әртістерінің кәсіби дайындығын тәуір бағалады. «Бұл ұжыммен жұмыс істеу – мен үшін үлкен мәртебе. Барлық балериналар тартымды және іске ынта-шынтасымен кіріседі, материалды үйреніп алмайынша кейін шегінбейді. Маған бұл жұмыста ұсынған материалымды әртістер қалай қабылдай алғандығы, көркемдік басшылық қандай пікірде екендігі маңызды. Көптеп-көлемдеп істейтін ұжымдық жұмыс болғандықтан, біздер бір-біріміздің пікірімізге құлақ асамыз» деп ағынан жарылды ресейлік балетмейстер.
Никита Дмитриевскийдің соны хореографиясы өзекті әлемдік үрдістер мен қазақ би мәдениетінің дәстүрлі әуенінің нәзік, сезімтал синтезіне айналды. Мультимедия саласындағы Ресейдің жетекші мамандарының бірі Леонид Басин спектакльдің бейнелік тұжырымын да Қазақстанның бай мәдениетінің ерекшеліктерін есепке ала отырып жасапты. Әуенін арнайы жазған – этнокомпозитор Болат Ғафаров, либреттоны Қазақстанның белгілі ақыны, сценарийші Бақыт Қайырбеков жазды.
УЫЗ ЛЕБІЗ
Айнұр СҰЛТАНҒОЖАЕВА, «Astana Ballet» мемлекеттік театрының әртісі:
– Бұл – біз үшін жаңа бағыттағы қойылым.
Никита Дмитрийевскиймен жұмыс істеу барысында үлкен тәжірибе алмасудамыз.
Аз уақыт аралығында спектакль қою әркімнің қолынан келе бермейді деп ойлаймын. Бұл – біз үшін үлкен жауапкершілік. Халықтың көңілінен шығады деген ойдамыз.
Театр ұжымы 3D-мэппинг пен бейнеинсталляция мамандарын да арнайы шақырып отыр. «Әлем» деп айдар таққан туынды біздің дәуірімізге дейінгі заманнан бастап бүгінге дейінгі ғасырлар көрінісін көрермен алдына әкелмек.
Асхат РАЙҚҰЛ