Биылғы Астана күні қарсаңында «Караван-2» тұрғын үй кешенінде мүмкіндігі шектеулі балалар мен жалғызілікті қарттарға арналған әлеуметтік оңалту орталығы ашылады. Бұл – әлеуметтік саланы дамытудың бірден-бір көрінісі.
Алматы ауданы әкімінің аппараты жанында 2005 жылдан бастап жалғызілікті қариялар мен мүгедектерге үйде әлеуметтік көмек көрсету бөлімшелері жұмыс істейді. Мұндағы екі бөлімнің қызметкерлері 170 адамға қызмет көрсетеді.
Бөлім меңгерушілерінің бірі Айгүл Майкошеваның айтуынша, бұл қызметте жай адам жоқ. Әлеуметтік жұмыс, ең алдымен, қайырымдылық іс. Жат пен жақыныңды бірдей көріп, қайырымдылық таныту кез келгеннің қолынан келе бермейді. «Әлеуметтік қызметкерлердің жалақысы өте төмен, кейде атқарылған еңбектің басты бағасы алғыс қана болатыны да белгілі. Алайда, солай бола тұрса да, осы мамандық бойынша қызмет жасап жүргеніме қуаныштымын» – дейді ол.
Бүгін екі бөлімде 29 қызметкер жұмыс істейді. Олардың қатарында 2 меңгеруші, 2 психолог, 2 кеңесші және 1 фельдшер бар. Бұл мамандыққа келгендердің дені – мұғалімдер мен дәрігерлер. Себебі, аталған кәсіпте адамдардың жан дүниесін түсіне білетін адамның болуы міндетті. Жұмыстың негізгі принципі – жаттың проблемаларына немқұрайлы қарамау. Ал, қызметкерлердің басты мақсаты – зейнеткерлер мен мүмкіндігі шектеулі жандарға әлеуметтік-тұрмыстық қызметтер, мемлекеттік, әлеуметтік, медициналық кеңес беру және басқа да көмек түрлерін алуға жәрдемдесу. Жақында жалғызілікті қариялар әлеуметтік қызметкерлермен бірге Астана қаласының Успения кафедралды соборына барып, мәскеулік Әулие Матронаға бас иіп қайтты.
Гүлбаршын ӨКЕШҚЫЗЫ
