Әлеуметтік төлемдер көлемі ұлғайып келеді
Қалалық мәслихаттың бюджет, экономика, өнеркәсіп және кәсіпкерлік мәселелері жөніндегі тұрақты комиссиясының кезекті отырысында азаматтардың жекелеген санаттарына әлеуметтік көмек көрсету мақсатында атқарылып жатқан жұмыстар кеңінен талқыланды.
Осыған орай сөз алған қалалық Жұмыспен қамту және әлеуметтік бағдарламалар басқармасының басшысы Ләззат Әбуева бұл мәселе Мемлекет басшысы Нұрсұлтан Назарбаевтың үнемі назарында екенін ескере келе, Елбасы Жолдауларынан туындаған тапсырмаларға сәйкес, елордада аз қамтылған отбасылар мен қамқорлыққа зәру азаматтарға әлеуметтік көмек көрсету бағытында жүзеге асырылған шараларға тоқталды. Бұл ретте Астанада халыққа әлеуметтік жағынан қолдау көрсетіп, олардың мүддесін қорғау мақсатында атқарылып жатқан жұмыс аз емес.
– Өткен жылы әлеуметтік қолдауға зәру 75 мыңдай адамға 3 295 450 мың теңге көлемінде көмек көрсетілсе, биыл әлеуметтік төлемдерге 4 231 496 мың теңге бөлу көзделіп отыр. Оның тең жартысы жергілікті бюджет қаражаты есебінен төленеді,- деді Л.Әбуева.
Бюджет қаражаты есебінен «Жергілікті өкілетті органдардың шешімі бойынша азаматтардың жекелеген санаттарына әлеуметтік көмек» бағдарламасында 2015 жылы азаматтардың жекелеген санаттарына 2 602 820 мың теңге көлемінде әлеуметтік көмек көрсетілмекші.
Ұлы Отан соғысындағы Жеңістің 70 жылдығын мерекелеу шеңберінде жүргізілген жұмыстарға да қомақты қаржы бөлініп, 217 майдангер мен соларға теңестірілген 5 000 адамға, сондай-ақ тыл еңбекерлеріне материалдық көмек көрсетілген. Соғыс ардагерлері бірыңғай киіммен қамтамасыз етіліп, ұрыс даласында қаза болған қазақстандық жауынгерлер жерленген жерлерге бару үшін әлеуметтік көмек пен дәрі-дәрмек сатып алуға, шипажайлық-курорттық емделуге жеңілдіктер қарастырылды. Ұлы Отан соғысының ардагерлері мен соларға теңестірілгендер және барлық зейнеткерлер, мүгедектер мен көп балалы аналар қалалық қоғамдық көлікте тегін жол жүру, тістерін ақысыз протездеу құқына ие. Осы жөнінде айта келе, басқарма басшысы Астанада аз қамтылған отбасыларды қолдау мақсатында атаулы әлеуметтік көмек көрсетіліп жатқанын, сонымен қатар коммуналдық қызметтерге, тұрғын үй күтіміне арнаулы заңнамада белгіленген тәртіппен телекоммуникация желісіне қосылған телефон үшін абоненттік төлемақының ұлғаюы бөлігіндегі байланыс қызметтеріне төлемдерді төлеуге, қаладағы ресми мерзімді басылымдарға жазылуға, моншаларға, шаштаразға баруға ақшалай төлем түрінде көмек көрсетіліп жатқанын жеткізді.
– Ел экономикасы қарыштап дамыған сайын халықтың әлеуеті жақсарып, тұрмысы түзеліп келеді. Ал, зейнетақы мен әлеуметтік төлемдер мөлшерінің кезең-кезеңімен артуы оған дәлел болса керек. Бұл ретте қала басшылығы да әлеуметтік саладан қаржысы мен көмегін аяп қалып жатқан жоқ. Өзге өңірлердің жұмыссыз азаматтары біздің қалаға келіп жұмыс істеп, табыс тауып жүр. Осының өзі қаламыздағы әлеуметтік мәселелердің оң шешімін тауып, халық тұрмысының жақсарып келе жатқанын көрсетеді, – деді басқарма басшысы.
Демек, өткен жылмен салыстырғанда биыл елордалықтарға көрсетілетін әлеуметтік көмек көлемі 1 млрд теңгеге ұлғайған. Осыған қарап-ақ, елордалықтардың жағдайы шын мәнінде жақсарып келе жатқанын аңғару қиын емес. Әлеуметтік мәселе ойдағыдай шешілмейінше, елдің тұрмыстық ахуалы жақсармайтыны белгілі. Осыны ескерген қалалық мәслихаттың хатшысы Сансызбай Есілов алдағы уақытта әлеуметтік көмектің нақты қамқорлыққа зәру адамдарға көрсетілуін мықтап қадағалауды тапсырды.
Гүлбаршын ӨКЕШҚЫЗЫ