Астанада биылғы жаңа оқу жылы жақсы басталды. Алғашқы қоңырау салтанатында мұғалімдер қатарының жас мамандармен толыққандығына көз жетіп, мектеп табалдырығын алғаш аттаған бүлдіршіндердің де аз еместігін аңғардық. Мерекелік іс-шаралар мейірлі ұстаздардың мерейін үстем етіп, оқушыларды шат-шадыман күйге бөледі.
Ата Заңмен астасып…
Алдымен ҚР Тұңғыш Президентінің Мұражайы және «Нұр Отан» ХДП «Жас Отан» жастар қанаты» қоғамдық бірлестігінің ұйымдастыруымен Райымбек батыр атындағы №50 «Қазғарыш» мектеп-лицейі бірінші сыныбының 30 оқушысы Конституция күніне арналған «Білім әлеміне саяхат» атты 40 минуттық алғашқы сабағын өткізді. Балалар мектеп табалдырығын аттай отырып, сол сабақ арқылы еліміздің Конституциясында жазылған өздерінің құқықтары мен міндеттерін білетін болды. Осы орайда, олар білім әлеміне қызықты саяхат жасап, еліміздің негізгі құжатын әзірлеу тарихымен және Елбасы Н.Назарбаевтың Ата заңымыздың жобасын жасаудағы рөлімен танысты. Шара соңы арнайы әзірленген вокалдық-хореографиялық композицияға ұласып, оқушыларға алғашқы сабақтан естелік ретінде сыйлықтар мен кәдесыйлар табыс етілді.
Бұл ретте, жыл сайын алғашқы қоңырауға дейін Астана қаласы әкімдігінің қолдауымен ұйымдастырылып тұратын дәстүрлі «Мектеп жәрмеңкесін» де айта кеткен жөн. «Мектепке жол» акциясы аясындағы бұл шара Астана, Қарағанды және Шымкент қалаларынан келген 40 кәсіпкердің қатысуымен қалалық алаңда өткен еді. Онда мектеп формасы, аяқ киімдер, кеңсе заттары, рюкзактар, оқулықтар және басқа да керек-жарақтар төмендетілген бағамен сатылды. Балалардың құқықтарын қорғау басқармасының бас маманы Лариса Темірлинаның айтуынша, күннің күрт суытып кетуіне қарамастан, Конституция күнімен тұспа-тұс келген айтулы шараға тұрғындар белсенді түрде қатысқан.
Оқу үшін бәрі дайын
Тура Білім күні қарсаңында жаңадан 1200 орынға есептелген №71 мектептің ашылу салтанаты өтті және №60 мектеп-лицейінің «Алғашқы қоңырау» мерекесіне Білім және ғылым министрі Бақытжан Жұмағұлов пен қалалық Білім басқармасының басшысы Әсима Бимендина келді. Олар ұстаздар мен оқушыларды жаңа оқу жылының басталуымен құттықтап, «Қазақстан-2050» стратегиясы: бір халық – бір ел – бір тағдыр» атты алғашқы қоңыраудан кейінгі алғашқы сабаққа қатысты. Одан кейін мектепті аралап, білім ордасының тарихымен танысып, ұстаздармен жиналыс өткізді.
Ал, елордалық 83 мектепте бір уақытта сәтті жалғасын тапқан мерекелік іс-шаралар аясында Астана қаласы әкімінің орынбасары Аида Балаева №15, 21, 36, 49, 61 мектептер мен лицейлердің ұжымымен кездесті.
«Сендердің басты мақсаттарың – жақсы білім алып, Қазақстанның лайықты азаматы болу. Мәдениетімізді, тарихымызды біліп, мемлекеттік тілді құрметтеп, меңгеру шарт. Отанымыздың патриоты болу – бәріміз де мақтан ететін өз мектебімізді, ауламызды, қаламызды сүюден басталады» деді Аида Ғалымқызы, оқушыларды Білім күнімен құттықтай отырып. Оның айтуынша, Астананың барлық мектептері педагогтармен толық қамтамасыз етілген.
Енді 2013-2014 оқу жылы әрбір педагогикалық ұжымның қызметіндегі негізгі бағыт – мемлекеттік стандарттарға сәйкес білім беру сапасын арттыру болуы тиіс.
«Жыл соңына дейін тағы 2 мектеп ашу жоспарланғанмен, әлі де оқу орындарының тапшылығы сақталып отырғаны рас. Мұның басты себебі, туу санының артуы мен халықтың көші-қоны болып табылады. Биылғы жаздың өзінде көші-қон үдерісі бойынша Астанаға 4 мыңнан астам оқушы келген» дейді әкім орынбасары. Соған қарамастан, бүгінде барлық мектептердің оқулықтармен қамтамасыз етілуі 98,4 пайызды құрапты. Оған қоса, бала ағзасын қалыптастыруда маңызды рөл атқаратындықтан, елорданың барлық мектептерінде ыстық тамақ берілетіндігін ескерген абзал. Асханалар жаңғыртылған техникалық қондырғылармен түгел жабдықталған. Соның арқасында оқушылардың 75,5 пайызы ыстық тамақпен, қалған 24,5 пайызы буфеттік тамақтандырумен қамтамасыз етіледі.
Сонымен қатар, 1 қыркүйек қарсаңында №52 мектеп-гимназиясының базасында да аз қамсыздандырылған және көп балалы отбасыдан шыққан 20-дан астам оқушыға мектеп жабдықтары үлестірілді. Бұл шараны Балалардың құқықтарын қорғау басқармасы Дін істері басқармасымен бірлесе ұйымдастырған.
Қауіпсіздік қадағаланды
Білім күнінде Астана қаласы ІІД Әкімшілік және жол полициясы қызметкерлері мен Білім басқармасының өкілдері ұйымдастырған «Балалардың қауіпсіздігі» қалалық акциясы да жаман өткен жоқ. Іс-шара барысында Жол полициясы қызметкерлері мен ювеналды полиция бөлімшелері қаладағы №3, №16, №65, №67, №71 орта мектептерінде балалардың жол-көлік травматизмі тақырыбында сөз сөйлеп, жаңа оқу жылының линейкасына қатысты. Сондай-ақ, орта білім беру мекемелерінің оқушыларына және ата-аналарға полиция қызметкерлерінің кәмелетке толмағандардың өмірі мен денсаулығын қорғау бойынша жүргізілетін жұмысы, сондай-ақ, кәмелетке толмағандардың қоғамдық орындардағы, білім мекемелеріндегі және жолдардағы қауіпсіздік шаралары туралы айтылды.
Еркеғали БЕЙСЕНОВ
