Алихан БАЙМЕНОВ, ҚР Мемлекеттік қызмет істері агенттігінің Төрағасы: ЗАҢСЫЗ ТАҒАЙЫНДАУЛАР ҮШІН ЖАУАПКЕРШІЛІК КҮШЕЙЕДІ
Еліміздің мемлекеттік қызмет саласында тың өзгерістер болғалы тұр. Бүгінде Парламент депутаттары талқылап жатқан «Мемлекеттік қызмет туралы» заң жобасы күшіне енсе, осы саланың пәрменділігі мен тиімділігі артып, мемлекеттік қызметшілерге қойылатын талаптар күшейтілмек. Осы жаңа реформалар төңірегінде Қазақстан Республикасы Мемлекеттік қызмет істері агенттігінің Төрағасы Алихан Байменовпен әңгімелескен едік.
Мемлекеттік қызметтің сапасын арттыру – басты талап
– Алихан Мұхамедияұлы, әңгімемізді былтыр шілде айында Елбасының Жарлығымен қабылданған мемлекеттік қызметтің жаңа моделі тұжырымдамасы жайынан бастасақ. Себебі, жаңадан енгізілгелі отырған реформаларға осы құжат өзек болып отыр емес пе? Жалпы Тұжырымдаманың қабылдануына не түрткі болды?
– Қай кезде де, қандай елде де өзінің мемлекеттік қызметіне көңілі толған қоғам болған емес. Себебі, қоғамның талғамы үнемі жетіліп отырады. Талғам жетілгеннен кейін талап та күшейеді. Талап күшейген кезде оған жауап беретін мемлекеттік сала немесе мемлекеттік саясатты айқындайтын тұлғалар жаңа шешімдер іздеуге кіріседі. Бүгінгі күні біздің елде де мемлекеттік қызмет жүйесін жетілдіру қажеттілігі туындап отыр. Оған қоса, Елбасы Қазақ елін әлемдегі бәсекеге қабілетті мемлекеттердің қатарына қосу жөнінде стратегиялық міндет қойды. Әрі, Дүниежүзілік сауда ұйымына кіру, Кедендік одақ, Еуразиялық экономикалық қауымдастық мәселелері де мемлекетік қызметтің сапасын жаңа деңгейге көтеруді талап етеді. Себебі, инвестициялар тартылып, елімізде жаңа жұмыс орындары көптеп ашылуы үшін оған қатысты шешімдер әзірлейтін мемлекеттік қызметшілердің білікітілігі жоғары болуы керек. Сондықтан, Елбасы мемлекеттік қызмет реформасы саласындағы әлемнің ең озық үлгілеріне сай болуымызды міндеттеп отыр. Міне, осы мақсат-міндеттер негізге алына отырып, мемлекеттік қызметтің жаңа моделі тұжырымдамасы қабылданған болатын.
– Еліміздің мемлекеттік қызмет саласын көрші елдермен салыстырғанда, қандай жетістіктерін атап өтер едіңіз?
– Қазақстан мемлекеттік қызмет реформасы саласында аймақтық көшбасшы болып саналады. Халықаралық сарапшылардың өзі еліміздің мемлекеттік қызмет үлгісін едәуір жоғары бағалап отыр. Мысалы, кезінде Дүниежүзілік банк Қазақстанды «аймақтағы көшбасшы» деп таныса, БҰҰ алдағы жылдары Астанада мемлекеттік қызмет туралы жаһандық конференция өткізуді ұсынып отыр. БҰҰ Даму бағдарламасының Астанада мемлекеттік қызмет істері жөнінде өңірлік хаб ашу туралы бастамасына Мемлекет басшысы қолдау көрсетіп, Үкіметке арнайы тапсырма берді. Осыдан бастап, барлық дамыған елдердің елшілерімен кездесу өткізіліп, мемлекеттік органдармен келіссөздер жүргізілді. Қазір осы мемлекеттік қызмет саласында АҚШ, Франция, Корея, Польша, Түркиямен тығыз қарым-қатынас орнатып, кейбір елдермен келісімшарттарға қол қойдық. Олар да бұл бағытта қоян-қолтық жұмыс жасауға ниетті. Сонымен бірге, Еуропалық одақ, Дүниежүзілік банк, Экономикалық ықпалдастық және даму ұйымы да мүдделілік танытып отыр. Еуропалық одақтың Қазақстандағы мемлекеттік қызметті реформалау және жаңғырту жөніндегі жобасы жүзеге асып жатқанын да айтуға болады.
Меритократия қағидаты күшейтіліп, кәсібилік деңгейі артады
– Еліміздің мемлекеттік қызмет жүйесі тағы бір жаңа реформаларды бастан өткізгелі отыр. Парламентте талқыланып жатқан заң жобасына қандай өзгерістер енгіздіңіздер? Оның тиімділігі мен халыққа беретін пайдасы қандай болмақ?
– Заң жобасы Мемлекет басшысының 2011 жылы шілде айында бекіткен мемлекеттік қызметтің жаңа моделі Тұжырымдамасын жүзеге асыру және нақты тапсырмаларын орындау мақсатында әзірленді. Бұл заңның қабылдануы Елбасы Н.Назарбаевтың «Қазақстанның әлеуметтік жаңғыртылуы: Жалпыға ортақ Еңбек қоғамына қарай 20 қадам» атты бағдарламалық мақаласында көрсетілген міндеттерге сәйкес келеді. Себебі, меритократия қағидаттарын күшейту әлеуметтік модернизацияның құралдарының бірі болып табылады.
Бұл салада Қазақстан соңғы жылдары Елбасының көрсеткен бағыты бойынша өзінің жетістіктерін озық елдермен салыстыратын деңгейге жетті. Дамыған елдердің тәжірибелері де зерттеліп, Президент мемлекеттік қызмет көрсету сапасын арттырып, кадр саясатын да еңбегіне қарап іріктеу мен бағалауды жүзеге асыру туралы тапсырмалар берген болатын. Заң жобасында осы мәселелерді түгелдей қамтуға тырыстық.
Қазақстан аймақта алғаш конкурстық жүйені енгізгенімен, соңғы жылдары оның объективтілігіне, әділдігіне сенім төмендеген. Мемлекеттік органдардың басшылары ауысқанда заңды айналып өтудің жолдарын тауып, жаңа барған жерінде адамдарды орындарын босатуға мәжбүрлеп, олардың орнына жаппай өзінің бұрынғы әріптестерін алып келуге тырысу көріністері байқалды. Сонымен бірге, мемлекеттік қызметкерлердің әдептілігі, сыбайлас жемқорлыққа қарсы тетіктердің әлсіздігі сияқты барлық мәселелер талдана келе, заң жобасының басымдықтары анықталды: біріншісі – кадрларды іріктеу және жоғарылату кезінде меритократия қағидатын күшейту; екіншісі – «А» басқарушылық корпусын құру; үшіншісі – барлық мемлекеттік органдарда арнайы басқару құрылымдары мен тетіктерін жетілдіру, оның ішінде кадр қызметінің мәртебесін көтеру; төртіншісі – тәртіптік және этикалық бақылауды күшейтіп, корпоративті мәдениетті жетілдіру.
Осының барлығын ескере отырып, бірінші басымдылыққа сәйкес меритократия қағидатын күшейтуге мән бердік.
– Сонда мұның қандай тетіктері бар?
– Біріншіден, конкурстардан алдын-ала белгіленген адамдар өте алмайтын жол қарастыруымыз керек. Сондықтан, тестілеуді конкурстан бөліп алдық. Яғни, болашақта мемлекеттік қызметке барғысы келетін азаматтар Агенттік белгілеген уақытта конкурсты күтпей, тест тапсырып, арнайы сертификат алып, содан кейін мемлекеттік орган жариялаған конкурсқа қатысады. Осыған орай мемлекеттік органның конкурсқа жұмсайтын уақыты 2-3 есеге дейін (45-50 күннен 15-20 күнге дейін) азаяды. Сонымен бірге тестілеудің бағдарламасын жаңғыртып, адамның кейбір тұлғалық қасиеттерін анықтайтын тестілеуді кейбір лауазымдар үшін енгізбекшіміз. Оған қоса заңнама туралы тестіні де күрделендіріп отырмыз. Конкурстық комиссиялардың жұмысында жариялылық пен тазалықты қамтамасыз ету үшін конкурстық комиссия мүшелерінің жауапкершілігін көтеру қарастырылған.
Агенттік тәжірибені алдымен өзінен бастап, таяуда бос лауазымдарға конкурс өткізген болатын. Сонда бір орынға қырық, кейбір орынға алпыс алты адамға дейін құжат тапсырды. Осы жолы конкурстық комиссияларды жаңа тәсілмен жасақтап, іріктеу кезіндегі әңгімелесу кезеңінде де барлығына тең жағдай туғызатын және бағалайтын тетіктер қарастырылды. Конкурсқа адам көп қатысқан жағдайда конкурстық әңгімелесудің екінші кезеңі ретінде эссе жазуды да енгізу қолға алынбақ. Әрі қарай мемлекеттік қызметкерлердің жұмысын бағалау мен мансаптық жоспарлау бойынша тың ұғымдар қабылданады. Жаңадан келген қызметшілерге тәлімгерлердің бекітілуі де ескерілді. Осының барлығы сапаны көтеруге алып келеді.
– Ал, заңсыз тағайындаулар анықталған жағдайда, лауазымды тұлғалар қандай жауапкершілікке тартылады?
– Әлбетте, басшылар кадрлық шешімдерін дұрыс әзірлеп, заң шеңберінде қабылдауы үшін жауапкершілікті күшейту керек. Таяуда ғана жүргізген тексерістер кезінде бір министрлікте осындай заңсыз тағайындаулар анықталған еді. Сол лауазым иесі тәртіптік жауапкершілікке тартылды. Міне, осындай бағыттарды қолға алуды көздеп отырмыз. Жауапкершілікке тартуды осылай күшейтсек, заңды қонышынан басып жүрген кейбіреулер аяқтарын тартыңқырайтыны сөзсіз.
Меритократия қағидаттарын қорғау бойынша тәртіптік комиссиялардың да пәрменділігін күшейтпекпіз. Ал, Мемлекеттік қызмет істер агенттігі меритократия мен кәсібиліктің қорғаушысына айналуға тиіс.
– Заң жобасында айқындалған «А» басқарушы корпусын жасақтауға іріктеудің ерекше тәртібі енгізіледі деп жүр…
– Иә, «А» басқарушы корпусында жоғары басқарушылық деңгейдегі мемлекеттік әкімшілік лауазымдар жасақталатындықтан, олар үшін Республика Президенті айқындайтын кадр резервіне іріктеудің және конкурстық іріктеудің ерекше тәртібі, арнайы біліктілік талаптары көзделіп отыр. Заң қабылданғаннан кейін кадр саясаты бойынша Ұлттық комиссия және өңірлік кадрлық комиссиялар құрылмақ. Олар «А» корпусының кадр резервін қалыптастырады. Осылайша, «А» корпусы лауазымдарына іріктеу және жоғарылату транспаренттік негізде жүзеге асырылатын болады.
Мемлекет басшысы «командалық көшуге» қатысты да бірнеше мәрте сын айтқанын білесіздер. Осыған орай заң жобасында «командалық көшулерді» неғұрлым азайту және мемлекеттік органдардың басшылары ауысқан жағдайда әкімшілік мемлекеттік қызметкерлердің қорғалуын күшейту мақсатында мемлекеттік органдар арасындағы ауысым тәртібімен тағайындаулар Елбасы белгілеген жағдайларда ғана жүзеге асырылатындығы қарастырылып отыр. Заңсыз кадрлық шешімдер үшін лауазым иелерінің жауапкершілігі күшейеді. Тағы бір басым бағыт – кадрлық қызмет орындарының рөлін арттыру. Ол енді персоналды басқару қызметі деп аталмақ. Бұл саладағы мемлекеттік қызметшілер өздері жұмыс істейтін мекеме ішіндегі кадрлардың жұмысына баға беріп, қызметке ұсынуда үлкен рөл атқаратындай деңгейге жетпекші.
Алғаш рет Заңда мемлекеттік қызметшілердің Ар-намыс Кодексін және жемқорлыққа қарсы нормаларды қосатын қызметтік этикасы жөнінде бөлек тарау енгізілгенін де атап өткім келеді.
«Заң жобасының тиімділігін түсінгендер көп болды»
– Тамыр-таныс, ағайыншылықтың жолын кесіп, сыбайлас жемқорлыққа тосқауыл қоятын заң кейбір лауазымды тұлғаларға ұнамауы мүмкін. Мұның алдында жүргізілген реформаға да кедергі келтіргісі келген шенеуніктер болғаны жұртшылықтың есінде. Ал осы жолы жаңа заңның жолында кесе-көлденең тұрғандар болды ма?
– Әлемдік тәжірибені зерделесек, кез келген саладағы, әсіресе, мемлекеттік басқару, әкімшілік салалардағы реформалар кедергісіз болмайды.
Біз 1999 жылғы мемлекеттік қызмет саласындағы реформаны жүргізген кезде Дүниежүзілік банкі Қазақстанды мемлекеттік қызмет реформасы саласында аймақтық көшбасшы деп танып, оған себеп болған бірнеше факторды атап өткен еді. Оның бастысы – Президенттің саяси жігерінде жатқанын айтты. Мысалы, сол 1990 жылы реформа кезінде шенеуніктердің біразы кадрларды конкурс арқылы іріктеу жүйесінің енгізілгенін қаламады, бірақ, Президент соған қарамастан, заңға қол қойды. Сөйтіп, мемлекет басшысының саяси жігері мен стратегиялық көрегендігінің арқасында Қазақстан алға жылжыды. Саяси жігер осындай мемлекеттік қызмет ісінде ерекше байқалады. Мысалы, көрші Ресейді алайық. Бұл елде осы бағыттағы заңдар әлі күнге дейін қабылданбай келеді. Себебі, бұл заңдарға мемлекеттік аппарат ішіндегілер, қолында ықпалы бар лауазым иелері қарсы. Бізге де 1999 жылы кедергі келтіргісі келгендер болды. Бірақ заң күшіне енгеннен кейін көндікті. Енді олар бұл талапты айналып өтудің жолын іздестіре бастады. Мұны біз көріп-білгеннен кейін осыған тосқауыл қоюға ниеттеніп отырғанымызды жоғарыда айттық. Дегенмен, 1999 жылдары жасалған реформалар негізінен өзінің міндеттерін толық орындады деуге болады. Содан бері 500 мыңнан астам адам мемлекеттік қызмет конкурсына қатысып, соның 130 мыңы жұмысқа қабылданды. Әрине, көпшілігі таза әрі әділ конкурс арқылы өткенімен, тамыр-таныстықты пайдаланғандар да жоқ емес. Бірақ, мысалы, жоғары оқу орнына түскенде сыбайлас жемқорлықтан қауіптеніп, талапкерлерді конкурссыз қабылдап, емтихан қорытындысынан бас тарта алмаймыз ғой?! Конкурстық жүйені де сол секілді әрі қарай жетілдіру – бүгінгі міндет. 1990 жылдардың ортасында министр, әкім ауысқанда орталық аппараттардың 60 пайызына жуығы жаңартылса, қазір әрі кеткенде 20-25 пайызы ғана өзгереді.
Ал, 1999 жылдан бері 550 мыңнан астам азамат конкурсқа қатысқан екен. Яғни, сол азаматтар түгел Конституцияны оқып, заңдарды біле бастады. Қазір қолданыстағы заңның мемлекет үшін тиімділігін, артықшылығын түсінетін басшылар көбейді. Лауазымды тұлғалардың басым көпшілігі кадр саясатын жетілдіруді қолдайды.
Мемлекеттік қызметшілердің тәртібі қатаң қадағаланады
– Мемлекеттік қызметшілердің көпшілікпен қарым-қатынасы, әдебі жөнінде әртүрлі пікірлер айтылады. Жалпы заңға енгізілген өзгерістер мемлекеттік қызметкердің қоғамдағы жағымды бейнесін қалыптастырып, халыққа жақындатып, беделін көтере алады деп ойлайсыз ба?
– Бірінішден, бұл заңда мемлекеттік қызметшілердің әдебіне байланысты бөлек бап бар. Саяси мемлекеттік қызметшілердің әдебіне соңғы кездері Республика Президенті Әкімшілігі де айрықша мән беріп отыр. Заңда бекітілген нормалар үшін жауапкершілік бөлек. Себебі, адамдардың құқықтары мен бостандықтары тек заң арқылы реттеледі. Кезінде Президент Жарлығымен Ар-намыс Кодексі қабылданған болатын. Енді ол нормалар заңмен бекітіліп, сол үшін жауапкершілік деңгейі жоғарылайды. Бұл – қоғамға жаңа мүмкіндік береді. Себебі, азаматтар заң арқылы мемлекеттік қызметшіден қарым-қатынас мәселесінде әдеп, мәдениет сақтауын талап ете алады.
Екіншіден, мемлекеттік қызметшілердің тәртібін, елмен қарым-қатынасы деңгейін қадағалайтын органдарға да жаңа мүмкіндіктер беріледі. Арнайы Жарлықтар қабылданған, осы бойынша әр мемлекеттік мекеменің ішінде өз ерекшеліктеріне байланысты әдеп нормалары енгізіледі. Мұны бақылайтын тәртіптік кеңес пен тәртіптік комиссиялардың жұмысы жетілдіріліп, міндеттері айқындалады. Сонымен қатар, әрбір мемлекеттік салада тәлімгерлік-оқыту жүйелері, тиісті үлгілік ережелері бекітілетін болады. Әрине, мұның бәрі бірден бола салмайды, біртіндеп жүзеге асырылатыны анық. Айталық, сыбайлас жемқорлықпен табысты күресетін елдердің тәжірибесін зерделесек, олар үлкен жемқорлыққа жол – ұсақ әдепсіздіктен, біреудің құқығын бұзудан басталатынын түсінген. Сондықтан бұл елдерде оның алдын-алуға ерекше мән береді. Яғни, сыбайлас жемқорлықты болдырмау шараларын қарастырады. Ол үшін заң бұзушылықтың алдын алуға қатысты мәселелердің қыр-сырын әр мемлекеттік қызметкер білуі тиіс. Сондықтан да оларды оқытуды қолға алмақпыз. Осының барлығы, түптеп келгенде, сыбайлас жемқорлыққа негіз болатын факторларды болдырмау. Бас прокуратура, Қаржы полициясы мамандары жасалған қылмыспен күресіп, оларды анықтау және жазалау жұмыстарымен айналысатын болса, біздің міндетіміз – жемқорлықтың алдын алу, тәрбие, әдептілік нормаларын сіңіру.
Қазақ тілін білуге міндеттейтін заңның туатыны шүбәсіз
– Мемлекеттік қызметкердің міндеті – халыққа қызмет ету. Ол елінің, ұлтының патриоты болуы керек. Бірақ қазіргі біз көріп жүрген қызметкерлердің өн бойынан мұндай қасиеттерді көре бермейміз. Мемлекеттік қызметкерлеріміздің көбі мемлекеттік тілде сөйлемеуі – соның бір мысалы. Мемлекеттік қызметшілерге қазақ тілін білуге міндеттейтін заң қашан туады?
– Өзіңіз айтқандай, патриоттықтың тілмен байланысы да бар. Бірақ қазақ тілін меңгермеген мемлекеттік қызметкерлердің бәрін бірдей патриот емес деп айтуға тағы болмайды. Тілді білмеудің тарихи себептері көп қой. Кезінде қазақ тіліне балта шапқан қандай жүйе екенін әр адам есінде сақтауы керек. Мен осы қызметке араға 11 жыл салып келгенде байқағаным, мемлекеттік органдарда қазақ тілін білу деңгейі едәуір жоғарылаған. Мысалы, Президент Әкімшілігімен хат алмасу – негізінен қазақ тілінде. Үкімет кеңсесімен де солай. Әрине, әзірше мемлекеттік іс-қағаздары қос тілде жүреді. Өйткені, бәрі бірдей қазақ тілін жетік меңгеріп, құжаттарды қазақша дайындай алмауы мүмкін. Сондықтан тәжірибесі мол, отаншылдық сезімін жүрегінде ұялатқан азаматтарды тілді білмегені үшін жұмыстан кетіру әділетсіздік болар еді. Елбасының Жарлығымен бекітілген «Қазақстан Республикасында Тілдерді дамыту мен қолданудың 2011-2020 жылдарға арналған мемлекеттік бағдарламасында» мемлекеттік тілді дамытудың бағыттары белгіленген. Президент мемлекеттік тілді әр азамат меңгеру қажеттігін үнемі айтып келеді. Енді оны жүзеге асыру ұлтымыздың ішкі жұмысына байланысты. Келешекте тілді білуді міндеттейтін талаптар заңнамада белгіленетініне мен шүбә келтірмеймін. Бүгінде мемлекеттік тілді меңгермей, алға ілгерілеу мүмкін еместігін бәрі де түсінді. Сондықтан бұл мәселе де бірте-бірте шешімін табатынына сенемін.
– Әңгімеңізге рахмет.
Әңгімелескен: Қымбат ТОҚТАМҰРАТ